პოლონეთის უშიშროების სააგენტომ დააკავა უცხო ქვეყნის ორი მოქალაქე, რომლებიც ეჭვმიტანილნი არიან შპიონაჟში, - წერს ადგილობრივი გამოცემა ,, Gazeta Wyborcza“.

წინასწარი ინფორმაციით დაკავებულია ორი ბელორუსი, რომლებიც ახორციელებდნენ სადაზვრევო საქმიანობას რუსეთის სასარგებლოდ. ისინი ჯერ კიდევ მარტის დასაწყისში იყვნენ დაკავებულნი, თუმცა მაშინ ამის შესახებ ინფორმაცია არ გავრცელებულა.

პოლონეთის უშიშროების მიერ დაკავებული ერთ-ერთი აგენტი არის ბელორუსიელი დიპლომატი, რომელიც მსახურობდა როგორც სამხედრო ატაშე. ის გასულ კვირას იქნა გაძევებული პოლონეთიდან. წყაროს ინფორმაციით, მან დაკავებამდე მოასწრო, შეეგროვებინა ინფორმაცია სამხედრო ობიექტების შესახებ.

როგორც ,,Интерфакс-Запад“ გადმოსცემს მინსკში ქვეყნის მოქალაქეების შესაძლო დაკავებასთან დაკავშირებით კომენტარს არ აკეთებენ.

ბოლო დროს, პოლონეთი ხშირად ავრცელებს ინფორმაციას იმ აგენტების დაკავების შესახებ, რომლებიც რუსეთის სასარგებლოდ მუშაობენ.