ე.წ. ნავთლუხის სპეცოპერაციისას დაღუპულთა მშობლები დამნაშავეთა დასჯას მოითხოვენ

სამართალი - 21:58, 13 Mar, 2014

1952

ნავთლუღის სპეცოპერაციის საქმეზე ლევან ქარდავას და გიორგი მაზმიშვილის დაკავებას 2006 წელს შემთხვევის დროს მოკლული ახალგაზრდების ახლობლები გამოეხმაურნენ.ისინი დამნაშავეების დასჯა მოითხოვენ.
მარად ართმელიძის მამის მიხეილ ართმელიძის განცხადებით, 2006 წელს სისხლიანი სპეცოპერაცია, სხვა ადამიანების დაშინების მიზნით ჩაატარეს.
"თხოვნით მივმართავ საგამოძიებო ორგანოებს, დღემდე ნანატრ ხელისუფლებას, რომ ჩვენისთანა დაძირულ მშობლებს, ოჯახებს მიაქციონ ყურადღება. დაიცვან მათი ინტერესები. გამოიძიონ საქმე სწორი მიმართულებით. აუტანელია თუ როგორ აცურავეს ჩვენი შვილები სისხლის გუბეში. გვინდა ვნახოთ სამართლიანობა”, - განაცხადა მიხეილ ართმელიძემ “პირველ პრესკლუბში”.
შოთა გორგოძის დედის ნარგიზა გორგოძე კი ბაჩო და დათა ახალაიების უმკაცრესად დასჯას მოითხოვს, “ჩემს შვილს კი არ გამიცოცხლებს, მაგრამ მაინც მინდა, რომ ისეთი სასჯელი მისცენ, როგორც ჩემი შვილი აწამა, ისე მინდა, იწამოს ისიც. ბაჩო ახალაიას ცოლი, რომ გამოდის ქუჩაში და ტირის მისი ქმარი როგორ ჩააგდეს ციხეში. მისი ქმარი სუნთქავს, მას ხედავს და ხმას გაიგონებს, მე ჩემი შვილის ხმა როგორ გავიგონო? მერჩია ციხეში ყოფილიყო და მისი ერთი სიტყვა მაინც გამეგო”, – განაცხადა ნარგიზა გორგოძემ “პირველის" პრესკლუბში.