უკრაინის პრემიერ-მინისტრი არსენი იაცენიუკი უშვებს, რომ რუსეთის ფედერაციის პრეზიდენტ ვლადიმერ პუტინის პირველი სცენარია „ყირიმის მფლობელობაში აღება ამა თუ იმ ფორმით“. მაგრამ ის შეიძლება უფრო შორსაც წავიდეს: „რუსეთს სხვა სცენარიც აქვს - როგორ დაიპყროს მთელი უკრაინა, მათ შორის უკრაინის დედაქალაქიც. ყველაფერი დამოკიდებულია მის (პუტინის) პერსონალურ მიზნებზე“.

ამის შესახებ იაცენიუკმა ვაშინგტონში ატლანტიკურ საბჭოში, აშშ-ში საქმიანი ვიზიტისას, 12 მარტს განაცხადა.

თავის მხრივ აშშ-ის პრეზიდენტმა ბარაკ ობამამ, იაცენიუკთან შეხვედრისას თეთრი სახლის ოვალურ კაბინეტში, ასევე აღნიშნა, რომ მხოლოდ პუტინმა იცის, რას მიაღწევს რუსეთი ასეთი ქმედებით, ვინაიდან ის, ცხადია, მხოლოდ აფუჭებს ურთიერთობას უკრაინასა და ევროპასთან მომავალში.

„მე ვფიქრობ, რომ, ბოლოს და ბოლოს, ეს არც რუსეთის ინტერესებშია“, - თქვა მან. ამერიკელი პრეზიდენტის აზრით, რუსეთის ფედერაცია პირიქით, არ უნდა ეწინააღმდეგებოდეს უკრაინის ევროპულ არჩევანს, არამედ უნდა იფიქროს გაერთიანებულ ევროპასთან ვაჭრობასა და ეკონომიკური კავშირების გამყარებაზე.

„ეს რუსეთს ძლიერს გახდის, და არა - სუსტს. მაგრამ, ნათელია, რომ ბატონ პუტინს რამდენადმე სხვა აზრი აქვს ამის შესახებ“, - თქვა ობამამ.

მოამზადა ლევან ებრალიძემ.