ლენტა.რუ კრემლის მხრიდან ზეწოლაზე ალაპარაკდა

მსოფლიო - 22:05, 12 Mar, 2014

2984

რუსული ინტერნეტსაინფორმაციო სააგენტო "ლენტა.რუ", რომლის მთავარი რედაქტორი გალინა ტიმჩენკო სამსახურიდან გაათავისუფლეს, კრემლის მხრიდან რედაქციაზე ზეწოლის შესახებ საუბრობს და საგანგებო განცხადებას ავრცელებს.
"დღეს კომპანია "Афиша-Рамблер-SUP"-ის მფლობელმა ალექსანდრ მამუტმა "ლენტა.რუ"-ს მთავარი რედაქტორი გალინა ტიმჩენკო გაათავისუფლა და მის ადგილას ალექსეი გორესლავსკი – საგარეო კომუნიკაციების გენერალური დირექტორის მოადგილე დანიშნა. მიგვაჩნია, რომ ეს დანიშვნა რედაქციაზე პირდაპირი ზეწოლაა. დამოუკიდებელი მთავარი რედაქტორის გათავისუფლება და მართული მთავარი რედაქტორის დანიშვნა, მათ შორის პირდაპირ კრემლის კაბინეტიდან – მასმედიის შესახებ კანონის დარღვევაა, რომლის თანახმადაც ცენზურა დაუშვებელია.
ბოლო ორი წლის განმავლობაში თავისუფალი ჟურნალისტიკის სივრცე რუსეთში დრამატულად შემცირდა. გამომცემლობების ერთი ნაწილი პირდაპირ იმართება კრემლიდან, მეორე ნაწილი – კურატორების მხრიდან, მესამეები – იმ რედაქტორების მხრიდან, რომლებსაც სამსახურის დაკარგვის ეშინიათ. ზოგიერთი მედიასაშუალება უკვე დაიხურა, ზოგი უახლოეს თვეებში დაიხურება. უბედურება ის კი არ არის, რომ ჩვენ ვერსად ვიმუშავებთ, არამედ ის, რომ თქვენ, მგონი, აღარაფერი გექნებათ წასაკითხი.
ჩვენ, რა თქმა უნდა, ვიმედოვნებდით, რომ ჩვენთანაც მოვიდოდნენ. გვჯერა, რომ ეს სამუდამოდ არ იქნება. ყველა შემთხვევაში, ძვირფასო მკითხველებო, თქვენ ამის შესახებ უნდა იცოდეთ. ვიმედოვნებთ, მალე შევხვდებით", – ნათქვამია რედაქციის თანამშრომლების მიერ გავრცელებულ განცხადებაში.