16 წლის მარიამ ჩავლეიშვილის ცხედარი 40 დღის წინ, 1 თებერვალს თბილისში, 31-ე ქარხნის ტერიტორიაზე, იპოვეს.

"გურია ნიუსის" ინფორმაციით, გარდაცვალების ზუსტი მიზეზი ამ დრომდე უცნობია, ექსპერტიზის საბოლოო დასკვნა ჯერ არ გამოქვეყნებულა. თავიდან, მარიამის გარდაცვალების სხვადასხვა მიზეზს ასახლებდნენ, რომლებსაც ოჯახი კატეგორიულად გამორიცხავს.

„თვითმკვლელობის ვერსია გამორიცხულია. მეშინოდა, რომ ძალადობის მსხვერპლი არ ყოფილიყო. ამას ძალიან განვიცდიდი. ექსპერტმა, რომელმაც თავდაპირველი ექსპერტიზა ჩაუტარა, მითხრა, რომ არანაირი ძალადობის კვალი არ აღენიშნებოდა. მალე გახდება ცნობილი საჯარო ექსპერტიზის საბოლოო დასკვნა. ვერ ვხვდები, რა მოხდა. მარიამი გარდაცვალებამდე რამდენიმე დღით ადრე ავად იყო, ჰაერის უკმარისობა ჰქონდა. 4 დღის გასული იყო სკოლაში. არ გამოვრიცხავ, რომ იმ დღეს ცოტა დალია. ამ ასაკში მეც დამილევია, ალბათ, ყველას დაულევია ცოტა. არ ვიცი, რამ გამოიწვია ჩემი შვილის გონების დაკარგვა, მაგრამ ვიცი, რომ ის ვერსიები, რაც პრესაში გამოითქვა, სიმართლესთან ახლოს არ არის.“ - ამბობს მარიამის მამა.

ოჯახის წევრების ინფორმაციით, გარდაცვალების დღეს, მარიამი მეგობრებთან ერთად იმყოფებოდა, მათ ადრე დაემშვიდობა და დედასთან წავიდა.

„ გუნდაობდნენ ბავშვები. მარიამმა თქვა, რომ ადრე უნდა წასულიყო, რადგან დედა ელოდებოდა. შეიძლება მისი წამოსვლა შეუმჩნეველიც კი დარჩა. იქ ცუდი გზა იყო. ვფიქრობთ, რომ ფეხი დაუცდა, წაიქცა და გონება დაკარგა. მალე პოვნა ვერ მოხერხდა და გაიყინა“, - იხსენებენ ახლობლები.

შინაგან საქმეთა სამინისტროს თქმით, ექსპერტიზის საბოლოო დასკვნა და, შესაბამისად, გამოძიების შედეგები ცნობილი გახდება.