რუსეთის ათეულობით ხელოვნების მუშაკი ყირიმში განვითარებულ მოვლენებთან დაკავშირებით ვლადიმირ პუტინს თავის მხარდაჭერას უცხადებს.

აღნიშნულ ინფორმაციას, „იზვესტია“ ავრცელებს.

მხარდამჭერებს შორის არიან მოქანდაკე ზურაბ წერეთელი და რუსეთის სახალხო არტისტი, ბალეტი მოცეკვავე ნიკოლოზ ცისკარიძე.

"იმ დღეებში, როდესაც ყირიმის და ჩვენი თანამემამულეების ბედი წყდება, რუსეთის კულტურის მუშაკები ვერ იქნებიან პროცესების გულგრილი დამკვირვებლები ცივი გულით. ჩვენი საერთო ისტორია, ფესვები, კულტურა და მისი სულიერი წარმომავლობა, ჩვენი ფუნდამენტური ღირებულებები და ენა სამუდამოდ გვაერთიანებს.

ჩვენ გვსურს, რომ ჩვენი ხალხების ერთიანობას და კულტურას ძლიერი მომავალი ჰქონდეს. სწორედ ამიტომ, ჩვენ მტკიცედ ვაცხადებთ, რომ მხარს ვუჭერთ რუსეთის ფედერაციის პრეზიდენტის პოზიციას უკრაინასთან და ყირიმთან დაკავშირებით", – "იზვესტიას" ცნობით, ნათქვამია ერთობლივ განცხადებაში, რომელსაც წერეთელთან და ცისკარიძესთან ერთად ხელს აწერენ მსახიობი სერგეი ბეზრუკოვი, რეჟისორი ფიოდორ ბონდარჩუკი.

ნინა შადური