სუბარი პატიმრის მკვლელობასთან დაკავშირებით ადმინისტრაციის შეცდომას აღიარებს

სამართალი - 23:27, 07 Mar, 2014

2535

სასჯელაღსრულების მინისტრი სოზარ სუბარი მიიჩნევს, რომ რამდენიმე დღის წინ გეგუთის კოლონიაში დაღუპული გიორგი ფარტენაძის მკვლელობის თავიდან აცილება შესაძლებელი იყო.
აღნიშნულის შესახებ სასჯელაღსრულების მინისტრმს "პალიტრა ტვ"-ის ეთერში, გადაცემა "ემას შოუში" ისაუბრა.
"ამ კონკრეტულ ფაქტთან დაკავშირებით არის დაშვებული გარკვეული შეცდომები, რომელთა გათვალისწინების შემთხვევაშიც, ალბათ, შესაძლებელი იქნებოდა ამ დანაშაულის თავიდან აცილება, დანაშაულის, რომელიც დამთავრდა მძიმე ტრაგედიით - ახალგაზრდა კაცის მკვლელობით", - განაცხადა სოზარ სუბარმა გიორგი ფარტენაძის საქმესთან დაკავშირებით "დაშვებულ შეცდომაზე" საუბრისას.
როგორც გადაცემაში სუბარმა განაცხადა, გეგუთის ციხის დირექტორმა თანამდებობა უკვე დატოვა.
"ციხის დირექტორი გადადგა თანამდებობდიან. მოვალეობას ასრულებს მისი მოადგილე. პასუხისმგებლობა, სავარაუდოდ, დადგება და არაერთი ადამიანის, ოღონდ არ გავუსწრებ წინ გამოძიებას", - აღნიშნა მინისტრმა.
2014 წლის 4 მარტს, 02:30 საათზე, გეგუთის #14 დაწესებულებაში, ექვსადგილიან საკანში, სადაც ხუთი მსჯავრდებული იმყოფებოდა, პატიმრებს შორის დაპირისპირება მოხდა, რაც ერთ-ერთი მსჯავრდებულის, გიორგი ფარტენაძის გარდაცვალებით დასრულდა.
ნინა შადური