რასმუსენი - რუსეთის ქმედებებს ნატო სათანადოდ უპასუხებს

მსოფლიო - 12:28, 06 Mar, 2014

1677

ნატომ რუსეთთან ერთობლივი მისიები შეწყვიტა და ურთიერთობის გადახედვას აპირებს, - ამის შესახებ საგანგებო პრესკონფერენციაზე ალიანსის გენერალურმა მდივანმა განაცხადა.
ანდრეს ფოგ რასმუსენის განმარტებით, ალიანსი მომდევნო ერთი თვის განმავლობაში აღარც მოლაპარაკებებს გამართავს რუსეთის სამოქალაქო პირებთან და სამხედრო მაღალჩინოსნებთან.
ანდრეს ფოგ რასმუსენის განცხადებითვე, რუსეთთან მიმართებით ნატო მომდევნო ნაბიჯების გადასადგმელად, მინისტრებს აპრილში შეკრებს.
„ნატომ დღეს მიიღო გადაწყვეტილება, რომ გადადგას რამდენიმე ეფექტური ნაბიჯი, ჩვენ შევწყვიტეთ ნატო-რუსეთის ერთობლივი მისიისთვის მზადების პროცესი, ასევე გადავწყვიტეთ, რომ რუსეთთან არ ჩატარდეს სამოქმედქო ან სამხედრო შეხვედრები, ჩვენ გადავხედავთ ნატო-რუსეთთან თანამშრომლობის მთელ რიგ ასპექტებს, ალიანსის საგარეო საქმეთა მინისტრები გადაწყვეტილებას აპრილის დასაწყისში მიიღებენ, ყველა ეს ნაბიჯი კი არის მკაფიო გზავნილი, რომ რუსეთის ქმედებებს მოჰყვება შედეგი, ამასთან, ჩვენ გადავწყვიტეთ, გავაგრძელოთ ინტენსიური პარტნიორობა უკრაინასთან, დემოკრატიული რეფორმების განმტკიცების მიზნით“, - განაცხადა ანდრეს ფოგ რასმუსენმა.
მისივე თქმით, ასევე გადაწყდა რომ სირიის განიარაღების პროცესში შეჩერებულია რუსული სამხედრო გემების მონაწილეობა, რომლებიც ამერიკულ ხომალდებს აცილებდნენ.