რუსეთის ჯარების უკრაინის ტერიოტორიაზე არ შეყვანისკენ, უკრაინის რადა რუსეთის პრეზიდენტს ვლადიმერ პუტინს მოუწოდებს.

აღნიშნული მიმართვა, უკრაინული მედიის ინფორმაციით, ქვეყნის პარლამენტმა გუშინდელ სხდომაზე მიიღო, რომელსაც მხარი 318-მა დეპუტატმა დაუჭირა.

პუტინისადმი მიმართვა 10 პუნქტისგან შედგება, რომელშიც ნათქვამია, რომ უკრაინა არის დამოუკიდებელი სახელმწიფო და ნებისმიერი სამხედრო ჩარევა მის შიდა საქმეებში, დაუშვებელია.

დოკუმენტის თანახმად, ყირიმი არის ავტონომიური რესპუბლიკა, რომელიც უკრაინის განუყოფელი ნაწილია, მასზე ვრცელდება უკრაინის კონსტიტუცია და კანონები. უკრაინის ტერიტორიაზე სამხედროების, ტექნიკისა და შეიარაღების ნებისმიერი გადაადგილება უნდა ხორციელდებოდეს მხოლოდ უკრაინის კომპეტენტურ ორგანოებთან შეთანხმებით და უკრაინის კანონმდებლობის შესაბამისად.
ვლადიმერ პუტინს დეპუტატები მიმართავენ, არ დაუშვას უკრაინის ტერიტორიაზე შეიარაღებული ძალების შეყვანა.

მიმართვის თანახმად, ნებისმიერი კონფლიქტის გადაჭრა მშვიდობიანი გზით უნდა მოხდეს, ძალის გამოუყენებლად, საერთაშორისო შუამავლობით ეუთოს, გაეროს, ევროსაბჭოს, ევროკავშირის, დსთ-ს და ბუდაპეშტის მემორანდუმის წევრი ქვეყნების შუამავლობით.