ყირიმის პარლამენტისა და მთვრობის შენობებს, რომელთა აღების შესახებაც ცნობილი 27 თებერვალს დილით გახდა, „ყირიმის რუსულენოვანი მოსახლეობის თავდაცვის წარმომადგენლები“ აკონტროლებენ. ამის შესახებ „ინტერფაქსი“ და „რია ნოვოსტი“ იტყობინებიან.

მთელი ნახევარკუნძულის მასშტაბით იქმნება რუსულენოვანი მოსახლეობის დანაყოფები, რომლებიც სიმფეროპოლში მიემართებიან.

უკრაინის შსს-ს დროებითმა მეთაურმა არსენ ავაკოვმა, რომელმაც პოსტი ქვეყანაში ხელისუფლების შეცვლის შემდეგ დაიკავა, განაცხადა, რომ შენობების ამღებები ავტომატებითა და ტყვიამფრქვევებით არიან შეიარაღებული. მისი თქმით, მომხდართან დაკავშირებით განგაში გამოცხადდა შინაგან ჯარებსა და მილიციაში. „პროვოკატორები მოქმედებენ. ახლა ცივი გონების, საღი აზრის კონსოლიდაციისა და ზუსტი მოქმედების დროა“, - განაცხადა მინისტრის მოვალეობის შემსრულებელმა.

პარლამენტისა და მთავრობის შენობებზე რუსეთის დროშებია აღმართული.

პარლამენტის შესასვლელთან ბარიკადია აგებული. ქალაქის ცენტრი გადაკეტილია.

გადაუმოწმებელი ინფორმაციით, ქალაქისაკენ ჯავშანტრანსპორტიორების კოლონა მიემართება.