პრორუსული ორგანიზაციის რამდენიმე ასეულმა აქტივისტმა ყირიმის უმაღლესი რადა დაბლოკა. ისინი ითხოვდნენ, რომ მათთან ადგილობრივი პარლამენტის სპიკერი ვლადიმირ კონსტანტინოვი გასულიყო და რიგგარეშე სესიის ჩატარებას შეპირებოდა. მოგვიანებით, ყირიმის პარლამენტის პრეზიდიუმმა მიიღო გადაწყვეტილება, ხვალ, ყირიმის უმაღლესი რადას რიგგარეშე სხდომის მოწვევის შესახებ.

აქციის მოანწილეები ითხოვენ, რომ რიგგარეშე სესიაზე ყირიმის პარლამენტმა ცენტრალური ხელისუფლების დაქვემდებარებაზე უარი განაცხადოს, დამოუკიდებლობის შესახებ რეფერენდუმი ჩაატაროს და რუსეთის მთავრობას დახმარებისთვის მიმართოს.

შეკრებილები სკანდირებენ: „რუსეთი“, „ყირიმს - ყირიმული ხელისუფლება“, „ყირიმო, აღსდექი“.

ავტონომიის უმაღლესი რადას წინ, აქციის ინიცირება აქამდე უცნობმა მოძრაობა „ყირიმის ფრონტმა“ მოახდინა. მიტინგს ასევე შეუერთდნენ კაზაკური ფორმირებები, „სახალხო-განმათავისუფლებელი მოძრაობის“ ჯგუფები და სხვა პროპუსული ორგანიზაციები.

ყირიმის პარლამენტის სპიკერმა კონსტანტინოვმა განაცხადა, რომ არ ცნობს უკრაინის უმაღლესი რადას ახალ კანონებს.