რა უთხრა კიევში დაღუპულმა დათომ მეუღლეს - საქმეს ვიპოვი და საჭმლის ფულს მაინც გამოგიგზავნითო

მსოფლიო - 18:37, 21 Feb, 2014

5777

უკრაინის დედაქალაქში გარდაცვლილი დათო ყიფიანის ნათესავი გიორგი კუტალაძე ამბობს, რომ ყიფიანს გარდაცვალებამდე ერთი საათით ადრე ესაუბრა.
მისივე თქმით, ყიფიანი დარდობდა, იმის გამო რომ უკრაინელებთან ერთად უიარაღოდ, შიშველი ხელებით იდგნენ, როცა ამ დროს სნაიპერები ისროდნენ.
კუტალაძის თქმით, ყიფიანი კიევში ბოლო ერთი წელი ცხოვრობდა, მას საქართველოში წლინახევრის ბიჭი და მეუღლე დარჩა. როგორც ყიფიანის ნათესავი „კვირის პალიტრასთან“ საუბარში აცხადებს დათოს მშობლები არ ჰყავს, ამ ხნის განმავლობაში კი ოჯახს უკრანაიდან, ტელეფონითა და ინტერნეტის საშუალებით ეკონტაქტებოდა.
„დათო "ნაციონალური მოძრაობის" წევრი იყო და კონცერტების ორგანიზებაში მონაწილეობდა. სცენაზე ტექნიკურ საკითხებს აგვარებდა... ხელისუფლების შეცვლის მერე, უმუშევარი დარჩა და უკრაინაში წავიდა, მეუღლეს უთხრა, რამე საქმეს ვიპოვი და საჭმლის ფულს მაინც გამოგიგზავნითო... უკრაინაში წასვლამდე, მეუღლესთან ერთად, თბილისში, მუხიანში ცხოვრობდა. მატერიალურად ძალიან უჭირთ, ძალიან... ახლა ჩამოსვენების ფულს აგროვებენ ჩვენი უკრაინაში მყოფი მეგობრები, ჩვენც ვცდილობთ, აქედან დავეხმაროთ, როგორც შეგვიძლია.. გუშინ საღამოს ვესაუბრე, ყველანი ერთად იყვნენ, ქართველებს ვგულისხმობ. სროლების ხმა ისმოდა და თავს გაუფრთხილდით-მეთქი. დათო დარდობდა, აქ უკრაინელებთან ერთად უიარაღოდ, შიშველი ხელებით ვდგავართ, ჩვენს გარშემო კი სნაიპერები დაძრწიან და გვესვრიანო... ამ საუბრიდან ერთ საათში მოუკლავთ.
გულსატკენია, რომ ქართულ ინტერნეტსივრცეში მისი მისამართით ასეთი აგრესია წამოვიდა, უბრალოდ გაოგნებული ვარ იმ ხალხის პოზიციით, ვინც ამბობს, რა უნდათ ქართველებს უკრაინაშიო, აფხაზეთის ომის დროს რომ უკრაინელები ქართველების მხარდამხარ იბრძოდნენ და უამრავი დაიღუპა, ეგ კარგი ყოფილა, მაგრამ ჩვენები იქ რომ არიან, ყველა დასახვრეტია თურმე, რადგან "ნაციონალები" არიან. მე არ ვარ "ნაციონალი", მაგრამ საშუალება რომ მქონდეს სიამოვნებით წავიდოდი“, - ამბობს გიორგი კუტალაძე.