ბოლო მონაცემებით უკრაინაში 72 დემონსტრანტი და 10 სამართალდამცველი დაიღუპა

მსოფლიო - 10:10, 21 Feb, 2014

1673

უკრაინის დედაქალაქში მომხდარ შეტაკებებს, ამ დროისთვის არსებული ცნობით, 82 ადამიანი ემსხვერპლა. ვრცელდება ინფორმაცია, რომ დაღუპულთაგან 10 სამართალდამცველია.
გასულმა ღამემ კიევის ცენტრში შედარებით მშვიდად ჩაიარა. ქალაქში მასობრივი შეტაკებები არ დაფიქსირებულა, თუმცა რამდენიმე ინციდენტი მაინც მოხდა.
სამხედროების ნაწილი ევრომაიდანის დატოვებას ცდილბდა, თუმცა ალყა მათ დემონსტრანტებმა შემოარტყეს. აქციის მონაწილეებს ავტობუსისთვის მოლოტოვის კოქტეილების სროლა სურდათ, თუმცა ისინი თავდაცვის ჯგუფის წევრებმა შეაჩერეს. დემონსტრანტებისგან სამხედროების დასაცავად ავტობუსის სახურავზე სასულიერო პირები ავიდნენ. თავდაცვის რაზმმა კი ისინი ევრომაიდნიდან სპეციალურად შექმნილი კორიდორით გაიყვანა.

ევრომაიდანზე ამ დროისთვის რამდენიმე ათასი ადამიანი რჩება. ისინი ბარიკადებს ამაგრებენ. ადგილობრივი მედია ავრცელებს ცნობას, რომ კიევის მიმართულებით სხვადასხვა რეგიონიდან კვლავ მიჰყავთ სამხედროები. დაუდასტურებელი ცნობით, ამ დროისთვის დედაქალაქისკენ ფეო-დოსიიდან საზღვაო ქვეითები მიემართებიან, დნეპროპეტროვსკიდან კი დესანტები გადაჰყავთ.
ამასთან, წუხელ, გვიან ღამით უმაღლესმა რადამ მომიტინგეთა წინააღმდეგ ძალის გამოყეების აკრძალვის თაობაზე დადგენილება მიიღო. მიღებული დადგენილების თანახმად, ჯარი, პოლიცია და სპეცდანიშნულების რაზმების წარმომადგენლები ყაზარმულ რეჟიმს დაუბრუნდებიან. რადამ უკრაინაში ძალადობა დაგმო და უშიშროების საბჭოს კი ანტიტერორისტული ოპერაციის ჩატარება აუკრძალა.