,,რატომ ცოცხლობენ ქალები მამაკაცებზე უფრო დიდხანს?”- ამ კითხვას მეცნიერები საუკუნეების განმავლობაში სვამდნენ და მოცემულ საკითხზე სხვადასხვა კუთხით მუშაობდნენ. მიუხედავად ამისა, დასაბუთებული მოსაზრება ქალებისა და კაცების სიცოცხლის ხანგრძლივობასთან დაკავშირებით არ არსებობს.

ერთ-ერთი ბოლო კვლევა ტოკიოს სამედიცინო-სტომატოლოგიურ უნივერსიტეტში პროფესორმა კატსუიკი კიროკავამ და მისმა კოლეგებმა ჩაატარეს. 20-დან-90 წლამდე ასაკის 356 ჯანმრთელი ქალისა და მამაკაცის სისხლის ნიმუშების შესწავლამ აჩვენა, რომ ასაკის მატებასთან ერთად, მამაკაცებში, იმუნური სისტემის სხვადასხვა მაჩვენებლის დონე უფრო მეტად მცირდება, ვიდრე ქალებში. კერძოდ, საუბარია T- და B-ლიმფოციტების, ლეიკოციტებისა და 2 სახის ციტოკინის შემცველობაზე.

გარდა ამისა, აღმოჩნდა, რომ მდედრობითი სქესის წარმომადგენელთა იმუნური სისტემა გაცილებით ბრძოლისუნარიანია ინფექციების წინააღმდეგ. მამაკაცებში იმუნური სისტემის შედარებით სწრაფი “დაბერების” გამო კი, იზრდება სხვადასხვა დაავადების განვითარების რისკი, რაც ამცირებს მათ სიცოცოხლის ხანგრძლივობას.

იმუნური სისტემის აღნიშნული მაჩვენებლების ასაკობრივი ცვლილებები გავლენას ახდენს ქალისა და მამაკაცის სიცოცხლის ხანგრძლივობაზე და ადამიანის რეალურ ბიოლოგიურ ასაკს ქმნის. აღსანიშნავია ისიც, რომ ვეტერინარულ სამეფო კოლეჯში თაგვებზე ჩატარებულმა კვლევებმაც ანალოგიური შედეგები აჩვენა.

მინოსეტისა და ლანკასტერის უნივერსიტეტის მეცნიერები კი ქალისა და მამაკაცის სიცოცხლის ხანგრძლივობის საკითხზე საუბრისას არგუმენტად ტირილს ასახელებენ. მათი თქმით, ტირილი ქალბატონებს სტრესის ადვილად გადატანაში ეხმარება.

მეცნიერები ასაბუთებენ, რომ ადამიანების 89% ტირილის შემდეგ შვებას გრძნობს. ემოციური დაძაბულობისგან გამოწვეულ ცრემლებთან ერთად ორგანიზმიდან ის ნივთიერებები გამოიდევნება, რომლებიც სტრესს პროვოცირებას უწევენ. აღმოჩნდა, რომ ტირილისას ადამიანი ღრმად სუნთქვას იწყებს, ეს კი ორგანიზმში კორტიზოლის (სტრესის განმავითარებელი ჰორმონი) დონის შემცირებას უწყობს ხელს.

ტირილისგან თავის შეკავებისა და ემოციების გაკონტროლების გამო კი მამაკაცებში სტრესის ჰორმონები იზრდება, რაც მწვავე გულ–სისხლძარღვთა დაავადებათა გამომწვევია. ეს ყველაფერი კი ქალისა და მამაკაცის სიცოცხლისუნარიანობის თანაფარდობასთან დაკავშირებულ კითხვას სცემს პასუხს.