კარლ ბილდტი - პრეზიდენტ იანუკოვიჩის ხელები სისხლითაა მოთხვრილი

მსოფლიო - 20:51, 19 Feb, 2014

2464

შვედეთის საგარეო საქმეთა მინისტრი კარლ ბილდტი უკრაინაში მიმდინარე მოვლენებს სპეციალური განცხადებით ეხმიანება, სადაც აღნიშნავს, რომ არა რუსეთის მხრიდან მუქარა, დღეს უკრაინა ევროპის გზაზე იქნებოდა. ბილდტის წერს, რომ უკრაინელ ხალხს დემოკრატია, რეფორმები და ევროინტეგრაცია სურს, მაგრამ მათ სურვილს რუსეთი დაუპირისპირდა, რომელსაც უკრაინის ევროპის ნაწილად გადაქევა არ სურს. ”მოდით სიმართლეს თვალი გავუსწოროთ და რეალურ მიზეზებზე ვისაუბროთ. გასულ ზაფხულს რუსეთმა ცალსახა ზეწოლა განახორციელა უკრაინაზე და ძალის გამოყენებით ქვეყანას არჩეული კურსი შეაცვლევინა. სასტიკი სავაჭრო ბარიერები შეუქმნა და ღიად დაემუქრა. რასაც უკრაინის მერყევმა მთავრობამ ვერ გაუძლო და დანებდა. დანებება კი უკრაინელმა ხალხმა ღალატად აღიქვა. ისინი უკეთესი მომავლისთვის იბრძოდნენ. მოსკოვის მხრიდან მუქარა, რომ არა უკრაინა დღეს დიდი ალბათობით უკეთესი მომავლის გზაზე იქნებოდა. თუმცა ძლევამოსილ ძალებს არ სურდათ უკრაინა ევროპის ნაწილად ეხილათ და უკრაინის ქუჩებში უდანაშაულო ადამიანების დახოცვაზე პასუხი სწორედ აქ უნდა ვეძიოთ, სწორედ აქ იმალება უდიდესი სიცრუე”, - წერს ბილდტი სპეციალურ წერილში, რომელიც შემდეგნაირად დაასათაურა: „ევროპაში ბნელი დღე დადგა“. ბილდტი მიიჩნევს, რომ უკრაინის პრეზიდენტს სისხლისღვრის შეჩერება შეეძლო. ”პრეზიდენტ იანუკოვიჩის ხელები სისხლითაა მოთხვრილი და ვშიშობ, რომ გზა რომელიც მან აირჩია კიდევ უფრო მეტ ტანჯვასა და ძალადობას მოიტანს. ის ერთადერთი იყო, ვისაც მკვლელობების შეჩერება შეეძლო, ამისათვის დემოკრატიული ოპოზიციისთვის ხელის გაწოდება იყო საჭირო. გაშლილი ხელის ნაცვლად კი ჩვენ მუშტი დავინახეთ”,- აღნიშნავს ბილდტი. მიუხედავად იმისა, რომ ბილდტი ფიქრობს უკრაინაში ბნელი ეპოქა დგება, მაინც იმედოვნებს, რომ უკრაინელი ხალხის ევროპული ოცნება გაიმარჯვებს და ქვეყანა დემოკრატიულ კურსს დაუბრუნდება. ”ვშიშობ უკრაინაში ბნელი ეპოქა დგება. ქვეყანაში კრიზისი უფრო გრძელი და ღრმა იქნება და ეს მე ძლიერ მაშფოთებს. ჩვენ მზად ვართ უკრაინას ეკონომიკური დახმარება გავუწიოთ და რეფორმებში დავეხმაროთ. რაც ხდებოდა და ხდება უკრაინაში ყველა საშინელებასთან ერთად არის ევროპული ოცნების დემონსტრაცია. ევროპისა რომელიც მშვიდობის, თავისუფლებისა და თანამშრომლობის სიმბოლოა. ადრე თუ გვიან, ის უკრაინაშიც იზეიმებს”,- წერს ბილდტი.