ყოფილი პრემიერი ვანო მერაბიშვილი სასამართლოს მიერ მის მიმართ გამოტანილს განაჩენს გამოეხმაურა.

მერაბიშვილის თქმით, ის თავიდანვე დარწმუნებული იყო, რომ ქუთაისში მისი დაცვის განხორციელება უაზრო იყო.

“მე თავიდანვე ვიყავი განწყობილი და ადვოკატებს ვარწმუნებდი, ქუთაისში ჩემი დაცვის განხორციელების უაზრობაში. გუშინ ქუთაისში სასამართლოს თავზე თეთრი ალამი აღიმართა. იმ ფონზე, როცა თეთრი ალამია აღმართული ქუთაისში, დღეს ვიმყოფები თბილისის სასამართლოში, ეს ნაწილობრივ მაინც ინარჩუნებს დამოუკიდებლობას. მესმის, რომ თქვენ მძიმე მდგომარეობაში იმყოფებით, განიცდით სერიოზულ ზეწოლას. ვიმედოვნებ, რომ ჩემს ადვოკატებს მიეცემათ საშუალება, ჩემი უდანაშაულობა დაასაბუთონ. იმედი, მაქვს, რომ დარჩა თუნდაც ეს შენობა, რომელიც ივანიშვილის საკუთრება ჯერ არ გამხდარა”, - განაცხადა მერაბიშვილმა.

დღეს თბილისის საქალაქო სასამართლოში მერბიშვილის ე.წ. 26 მაისის ეპიზოდზე ვანო მერაბიშვილის საქმის განხილვა განახლდა.

პროცესზე დაიკითხებიან დაცვის მხარის მოწმეები. დაგეგმილია შინაგან საქმეთა ადმინისტრაციის ყოფილი უფროსის შოთა ხიზანიშვილის და ანალიტიკური დეპარტამენტის ყოფილი უფროსის შოთა უტიაშვილის დაკითხვა. ასევე დღევანდელ პროცესზე დაიკითხება ბაჩო დოლიძე, რომელიც 2011 წელს მერიის პრეს-სპიკერის თანამდებობას იკავებდა და ირაკლი ფირცხალავა, რომელიც შსს-ს ყოფილი თანამშრომელია. საქმის განხილვას ეწსრება ვანო მერაბიშვილიც.