სასჯელაღსრულების მინისტრის მოადგილის, არჩილ თალაკვაძის განცხადებით ამ დროისთვის გეგუთის პატიმრების ჯანმრთელობის მდგომარეობა დამაკმაყოფილებელია.

როგორც ჟურნალისტებთან საუბრისას თალაკვაძემ განაცხადა, პატიმრებმა თვითდაზიანება იმ საყოფაცხოვრებო ნივთებით მიიყენეს, რომლის ფლობის უფლებაც მათ შინა განაწესით აქ აქვთ.

"პირადად გუშინ ექიმებთან ვიმყოფებოდი გეგუთის დაწესებულებაში, საიდანაც 17 მსჯავრდებულის გადაყვანა მოხდა სამოქალაქო კლინიკებში. მათ აღმოუჩინეს დახმარება და დააბრუნეს უკან. 14 ადამიანს პენიტენციური ჯანდაცვის ექიმებმა და გეგუთის სასჯელაღსრულების დაწესებულების ექიმებმა ადგილზე აღმოუჩინეს დახმარება. დღეს დილიდან ვითარება იყო სტაბილური. არც ერთი ადამიანის ჯანმრთელობას და სიცოცხლეს საფრთხე არ ემუქრება", - განაცხადა თალაკვაძემ.

რაც შეეხება პატიმრების მოთხოვნებს, თალაკვაძის თქმით გეგუთის ციხის ადმინისტრაციის შეცვლა არ მომხდარა, თუმცა მსჯავლდებულების მოთხოვნაზე გამოძიება მიმდინარეობს.

"ჩემს კომპეტენციას ეს არ განეკუთვნება, მაგრამ რამდენადაც ვიცი, გამოძიება იმ ფაქტზე, რაზეც თავიდან ჰქონდათ პრეტენცია, დაწყებულია, მაგრამ მათი მოთხოვნა არა გამოძიება, არამედ ადმინისტრაციის შეცვლაა. ადმინისტრაციის შეცვლა, ჩემი ინფორმაციით, არ მომხდარა, ხოლო პატიმრები აგრძელებენ თავისი მოთხოვნის წაყენებას", - განაცხადა თალაკვაძემ.

თალაკვაძემ განმარტა, რომ ძალის გამოყენებას სასჯელაღსრულების ადმინისტრაციის მხრიდან ადგილი არ ქონია.

სასჯელაღსრულების მინისტრის მოადგილეს ამ დროისთვის ზუსტი ინფორმაცია არ აქვს, თუ რამდენი ადამიანი შიმშილობს საპატიმროში, თუმცა მისი თქმით, ორი დღის წინ 800-მდე პატიმარი დარეგისტრირდა.