გაივლის პერიოდი და ვინც ახლა სისხლის სამართლებრივ დევნას ახორციელებენ კანონის სრული დაცვით აღმოჩნდებიან იქ, სადაც ახლა მე ვზივარ, აღნიშნული განცხადება ექს შსს და თავდაცვის მინისტრმა ბაჩო ახალაიამ დღეს გამართულ სასამართლო პროცესზე განაცხადა.

“იქიდან გამომდინარე, რომ ხელისუფლებამ ვერც ერთი დაპირება ვერ შეასრულა, საზოგადოებას მიართვეს სანახაობა, კერძოდ, ჩემი, მერაბიშვილის და სხვათა საქმეები და რაც დრო გადის ხედავთ, რომ ეს საქმეები იფშვნება. დარწმუნებული ვარ, მათ ეს სანახაობები სჭირდებათ. მე ვიცი და გიგი უგულავამაც თქვა, რომ კონკრეტულ მოსამართლეებზე მიდის ზეწოლა. არსებობენ მოსამართლეები, რომლებზეც ზეწოლის მოხდენა რთულია, მაგრამ არსებობენ ისეთებიც, რომლებსაც თავად სურთ პროკურატურის ნაწილი გახდნენ, ამიტომ საფრთხილოა ახლა წარმოებული გამოძიებები. ჩვენ არ გვყავს ის საგამოძიებო ორგანოები, რომლებიც რეალურ ობიექტურობას დაადგენენ. მათ არ აინტერესებთ რეალობის აღდგენა, მათ უნდათ ჩემი ციხეში ყოფნა. მათ ჰგონიათ, რომ ყველაფერი ჩაივლის და შერჩებათ. მიუხედავად იმისა, რომ ციხეში ვარ, ბევრ ინფორმაციას ვფლობ. წელიწადზე მეტია, წინასწარ პატიმრობაში ვიმყოფები. მე მგონი, ესეც უპრეცედენტოა. კარგად ვუვლი იმ დაწესებულებას, სადაც ვარ, რადგან გაივლის პერიოდი და ვინც ახლა სისხლის სამართლებრივ დევნას ახორციელებენ კანონის სრული დაცვით აღმოჩნდებიან იქ, სადაც ახლა მე ვზივარ“, - განაცხადა ახალაიამ.

ე.წ. ციხის ბუნტის საქმეზე პროკურატურა ახალაიას ორი მუხლით ჩადენილ დანაშაულს ედავება. პირველი ინსტანციის სასამართლომ ბაჩო ახალაია და მასთან ერთად საქმეში ბრალდებული პირები არაადამიანურ მოპყრობაში დამნაშავედ ცნო. მეორე მუხლით წაყენებული ბრალი კი, რაც სამსახურეობრივი უფლებამოსილების გადამეტებას გულისხმობდა, მოუხსნა. სწორედ ამას ასაჩივრებს ბრალდების მხარე სააპელაციო სასამართლოში.

ე. წ. ციხის ბუნტის საქმეზე ბაჩო ახალაიას წინააღმდეგ პროკურატურის საჩივარზე სააპელაციო სასამართლო გადაწყვეტილებას 14 თებერვალს, 17:00 საათზე გამოაცხადებს.

სააპელაციო სასამართლოში ახალაიას წინააღმდეგ საჩივრის განხილვა დღეს დასრულდა. მხარეებმა რეპლიკები თქვეს და ბრალდებულ ახალაიას საბოლოო სიტყვის თქმის საშუალება მიეცა.