26 მაისის სასამართლო პროცესზე ნინო ბურჯანაძემ იკითხა: „გასაკვირია, თუკი ჩემს მიმართ გადატრიალების მცდელობაზე ხელისუფლებას კომპრომატი ჰქონდა, რატომ არ დამიჭირეს?“ შსს-ს ანალიტიკური დეპარტამენტის ყოფილი უფროსი „ნიუპოსთან“ საუბარში აცხადებს, რომ „წინა ხელისუფლება პოლიტიკურ ლიდერებს არ აპატიმრებდა“.

„ასეთი იყო წინა ხელისუფლების გადაწყვეტილება. მხოლოდ იმის გამო, რომ წინა ხელისუფლება არ აკავებდა ოპოზიციური პარტიის ლიდერებს, არც ნინო ბურჯანაძე და არც ბადრი ბიწაძე არ დაუკავებიათ. მხოლოდ ირაკლი ოქრუაშვილი იყო რამდენიმე დღით დაკავებული“ - აღნიშნავს შოთა უტიაშვილი.

მისივე განმარტებით, იგორ გიორგაძის პარტიის წევრების დაპატიმრებას პოლიტიკურს ვერ უწოდებს, რადგანაც გიორგაძე „მას შემდეგ რაც საქართველოდან გაიქცა, პოლიტიკაში არანაირი გავლენა არ ჰქონდა.“ რაც შეეხება ნინო ბურჯანაძეს, შოთა უტიაშვილის განმარტებით, ის პარლამენტის ყოფილი თავმჯდომარე იყო.

შსს-ს ანალიტიკური დეპარტამენტის ყოფილი უფროსის შეფასებით, მაშინდელი ხელისუფლების პოლიტიკა ამ მიმართულებით გამართლებული იყო, რადგანაც საქართველოს კურსი ევროინტეგრაციისკენ ჰქონდა აღებული და პოლიტიკოსების დაკავება ამ პროცესს ხელს შეუშლიდა.

26 მაისის პროცესზე ნინო ბურჯანაძემ იკითხა: „გასაკვირია, თუკი ჩემს მიმართ გადატრიალების მცდელობაზე ხელისუფლებას კომპრომატი ჰქონდა, რატომ არ დამიჭირეს? თუ ეს ჩანაწერი სიმართლეს შეესაბამება და მოლაპარაკება მქონდა გრუ-სთან, საინტერესოა, მაშინდელმა შს მინისტრმა რატომ არ დამაკავა. ეს სისხლის სამართლის დანაშაულია“ - განაცხადა დაკითხვის დროს პარტია „დემოკრატიული მოძრაობის“ ლიდერმა.

საინტერესოა, რომ ნინო ბურჯანაძეს სკანდალური ჩანაწერის ექსპერტიზა არ მოუთხოვია. ჩანაწერში, რომელიც მაშინდელმა ხელისუფლებამ გაასაჯაროვა, ბურჯანაძე და მისი შვილი გრუ-ს შემოყვანასა და ხელისუფლების დამხობაზე საუბრობდნენ.