„დემოკრატიული მოძრაობის“ ლიდერმა ნინო ბურჯანაძემ საქალაქო სასამართლოში 26 მაისის აქციის დეტალები გაიხსენა და აღნიშნა, რომ „იმ დროს ხელისუფლებამ გადამეტებული ძალა გამოიყენა“.

მისი განცხადებით ერთ აქტივისტზე სამი სპეცრაზმელი მოდიოდა.

„დემოკრატიული მოძრაობის“ ლიდერმა 26 მაისი 9 აპრილს და 7 ნოემბერს შეადარა და განაცხადა, რომ იმ დღეს ყოფილმა ხელისუფლება აქციის მონაწილეებს გასასვლელი გზა არ დაუტოვა.

ბურჯანაძის თქმით, 26 მაისის აქციის საქმეში ვანო ერაბიშვილთან ერთად ბრალდებული უნდა იყოს საქართველოს ყოფილი პრეზიდენტი მიხეილ სააკაშვილი.

„უსამართლობაა, რომ აქ მარტო ვანო მერაბიშვილი ზის. პირველ რიგში აქ უნდა იჯდეს მიხეილ სააკაშვილი. თუ ვინმე დამნაშავეა, პირველ რიგში დამნაშავეა მიხეილ სააკაშვილი. იმედი მაქვს კიდევ მომიწევს აქ მოსვლა, უკვე სააკაშვილის წინააღმდეგ ჩვენების მისაცემად. 12 საათიდან სადღაც 10 წუთში მასშტაბური სადამსჯელო ოპერაციები დაიწყო. ეს არ იყო მიტინგის დაშლა. ძალიან საინტერესო გახლდათ ის არგუმენტაცია, რომელსაც იყენებდა ხელისუფლება. ჩვენ არ გვჭირდებოდა არანაირი სანქცია. საქართველოს კონსტიტუციაში პირდაპირ წერია, რომ მოქალაქეებს აქვთ შეუზღუდავი უფლება შეიკრიბონ და გამოთქვან თავისი მოსაზრება. არანაირი აუცილებლობა იმის, რომ მაინცდამაინც იმ დღეს ჩატარებულიყო აღლუმი რუსთაველზე, არ არსებობდა,“- განაცხადა ნინო ბურჯანაძემ.