17 მაისს თბილისის კინოთეატრებში უჩვეულო კომედია გამოვა. ფილმს საგანგებოდ ამ დღისთვის ცნობილი პროდიუსერი დავით ბეჟიტაშვილი გადაიღებს. იდეაც მას ეკუთვნის. არატრადიციული კომედია ორი მეგობრის შესახებ მოგვითხორბს, რომლებიც ევროპაში გამგზავრებას გადაწყვეტენ.

„17 მაისს იმიტომ, რომ ეს ჰომოფობიასთან ბრძოლის საერთაშორისო დღეა. ამ ფილმით ჩვენ მოვუწოდებთ ხალხს, რომ მიტინგზე კი არ წავიდეს ვინმეს წინააღმდეგ ან მხარდასაჭერად, არამედ მოვიდეს და ნახოს ეს ფილმი, სიუჟეტი სწორედ ამ დღეს შეესაბამება... ჩემი აზრით, ეს ფილმი დაძაბულობას განმუხტავს.“ - განმარტავს პროდიუსერი დავით ბეჟტაშვილი „პრაიმტაიმთან“ საუბარში.

მისივე თქმით, ფილმი კომედიური ჟანრის არის, რითაც ადამიანები უმცირესობების პრობლემებს სხვა კუთხით შეხედავენ და მიხვდებიან რომ „ეს ადამიანებიც საზოგადოების ჩვეულებრივი წევრები არიან და მათ ქვებითა და ლოდებით არ უნდა დავდევდეთ.“

დავით ბეჟიტაშვილი სიუჟეტზე ბევრს არაფერს ამბობს. თუმცა, პირობას დებს რომ მაყურებელი არ მოიწყენს და მოდუნების საშუალება არ მიეცემა. ფილმის პროდიუსერი ამბობს, რომ „ეს გეიპროპაგანდა არ იქნება“.

„ყველა პრობლემა გამოჩნდება ძალიან რეალურად, მაყურებელი ნახავს, რომ ეს არ არის თითიდან გამოწოვილი სცენარი ან მოგონილი სიუჟეტი, ჩვენ ვიგრძნობთ ყოველდღიურ ცხოვრებას დეტალებში. ვნახავთ, სად ხვდებიან ისინი კონფლიქტს, სად – წინააღმდეგობებს, სად ხვდებიან მათ კარგად და ასე შემდეგ. ეს არ არის დრამა ან ტრაგედია, ფილმი კომედიის ჟანრშია გადაწყვეტილი, სწორედ ამიტომ ავარჩიეთ მთავარ გმირებად კახელი და მეგრელი.“ - აცხადებს ბეჟიტაშვილი.