დღეს საქართველოს შეიარაღებული ძალების IV მექანიზირებული ბრიგადის სამხედრო მოსამსახურეები სიმონ ჯანაშიას სახელობის საქართველოს ეროვნულ მუზეუმს ესტუმრნენ.

ჯარისკაცებმა სხვადასხვა ექსპოზიცია დაათვალიერეს, მათ შორის, ქართული იარაღ-საჭურველის გამოფენა და საბჭოთა ოკუპაციის მუზეუმი.

თავდაცვის უწყების ერთ-ერთი პრიორიტეტი სამხედრო მოსამსახურეთა განათლების დონის ამაღლებაა. ამ მიზნით, თავდაცვის სამინისტროსა და ეროვნულ მუზეუმს შორის ერთთვიანი საგანმანათლებლო-შემეცნებითი პროგრამა ხორციელდება.

პროგრამა ჯარისკაცებისათვის ქართული საბრძოლო ტრადიციებისა და ისტორიის გაცნობას გულისხმობს. სამხედრო მოსამსახურეები საკუთარი წინაპრების, მათ შორის, მეფეების, მთავარსარდლების ნაქონ საბრძოლო იარაღებს, მათ აღჭურვილობასა და აღკაზმულობას გაეცნენ; განსაკუთრებული ყურადღებითა და ინტერესით დაათვალიერეს საბჭოთა ოკუპაციის მუზეუმი. ჯარისკაცების ეროვნულ მუზეუმში სტუმრობას და საკუთარი ისტორიის უშუალოდ გაცნობას საბრძოლო სულისკვეთების ამაღლების საქმეში განსაკუთრებული მნიშვნელობა აქვს.