ყოფილი პრემიერმინისტრი ვანო მერაბიშვილი სკანდალურ ვიდეოსთან დაკავშირებით პირველ კომენტარს აკეთებს.

"მე ეს ჩანაწერი მახსოვს და თქვენ კადრებში ხედავთ, რომ ჩანაწერი კეთდება ღიად. მე არ მრცხვენია, რომ ეს განცხადება გავაკეთე. ჩვენ გვქონდა ინფორმაცია, რომ მუხროვანის აჯანყებაში, გარდა იმ ადამიანებისა, ვინც საყოველთაოდ ცნობილია, მონაწილეობდა ორი რუსი მრჩეველი, ГРУ–ს თანამშრომლები და ჩვენ გვქონდა ინფორმაცია, რომ ამ ფაქტის დაფარვის მიზნით შეთქმულების მონაწილეებმა მოახდინე მათი ლიკვიდაცია. ჩანაწერში ჩანს, რომ მე ვიძლევი ინფორმაციას ამ ორი ადამიანის პოვნის შესახებ, რათა ჩვენ დაგვემტკიცებინა კავშირი ამ აჯანყებასა და რუსეთს შორის. ხოლო ის დანაყოფი, რომელმაც ოთანაძის დაკავება მოახდინა გლდანში საერთოდ არ იმყოფებოდა მუხროვანის ტერიტორიაზე ამ ვიდეოს სპეცოპერაციის დროს. მე ვარ ცამდე მართალი ამ საქმეში. მე არასოდეს გამიცია ბრძანება არც ერთი ადამიანის ლიკვიდაციის შესახებ", – განაცხადა ვანო მერაბიშვილმა.

მერაბიშვილი სამართალდამცავებს მოუწოდებს, რომ საქმე ობიექტურად და მიუკერძოებლად გამოიძიონ. მისი თქმით, ყველა მასალა ამ საქმესთან დაკავშირებული არის შსს–ში და მზადყოფნას გამოთქვამს თანამშრომლობისთვის.