დავით გაგუას სახელობის კლინიკაში დღეს ოპერაციები იმის გამო გადაიდო, რომ კლინიკას წყალი არ მიეწოდებოდა. "ნიუპოსტი" ინფორმაციის გადამოწმებას, თუ რატომ შეწყდა წყალმომარაგება ისეთ მნიშვნელოვან ადგილას, როგორიც სამედიცინო დაწესებულებაა, კომპანია "ჯორჯიან უოთერ ენდ პაუერში" შეეცადა.

როგორც "ნიუპოსტს" კომპანიაში განუცხადეს, აღნიშნულ ობიექტზე წყალმომარაგების შეწყვეტა ავარიულმა შემთხვევამ გამოიწვია.

"თბილისის რამდენიმე უბნისთვის და იქ განთავსებული დაწესებულებებისთვის, მათ შორის ლიუბლიანას ქუჩაზე მდებარე დავით გაგუას სახელობის კლინიკისთვის წყალმომარაგების შეწყვეტა წყალსადენის ერთ-ერთ ქსელზე გუშინ საღამოს მომხდარმა ფარულმა ავარიულმა დაზიანებამ გამოიწვია. ავარიის შედეგად წყალი მეტროსადგურ „ღრმაღელეში“ ჩაედინებოდა. კომპანიისგან და კომპანიისგან სასწრაფო რეაგირებას ითხოვდა. რეალურად კი, დაზიანება მოხდა სანზონის დასახლებაში, ერთ-ერთ კორპუსთან გამავალ 900 მმ-იან მაგისტრალურ მილზე. იმის გამო, რომ დაზიანება ფარული იყო, კომპანიის ტექნიკურ სამსახურს ჯერ საძიებო სამუშაოების ჩატარება მოუხდა, შემდეგ სადიაგნოსტიკო ჯგუფმა ავარიის ხარისხი დაადგინა. დაზიანებული მონაკვეთის რეაბილიტაციის მიზნით, აუცილებელი გახდა წყალსადენის 900 მმ-იანი ქსელისა და ასევე, სხვა დიამეტრის ქსელების წლისგან დაცლა, რამაც თბილისის გარკვეული არეალისთვის წყალმომარაგების შეწყვეტა, რიგი ქუჩებისთვის კი წყლის დაბალი წნევით მიწოდება გამოიწვია.

მაგისტრალური მილის დაზიანებული მონაკვეთის სარეაბილიტაციო სამუშაოები არ შეწყვეტილა და ამჟამადაც მიმდინარეობს. გათიშული არეალისთვის წყალმომარაგების აღდგენა დღეს, საღამოს 8 საათიდან ეტაპობრივად დაიწყება და ღამის საათებში წყალს ყველა გათიშული უბანი და ქუჩა, შესაბამისად, ყველა დაწესებულება ნორმალურ რეჟიმში მიიღებს.

რაც შეეხება გაგუას სახელობის კლინიკას, რომელიც იძულებული გახდა უწყლობის გამო დღეს დაგეგმილი ოპერაციები გადაედო და რის გამოც გულწრფელად ვწუხვართ, მაგრამ კლინიკის ადმინისტრაციას შეეძლო მიემართა „ჯორჯიან უოთერ ენდ ფაუერისთვის“ და იმ შემთხვევაში, თუ კლინიკას არ გააჩნდა სასმელი წყლის საკმარისი სარეზერვო მარაგი, კომპანია სპეციალური ავტოცისტერნებით დაუყოვნებლივ მიაწვდიდა მას საჭირო ოდენობით სასმელ წყალს", - აცნობა "ნიუპოსტს" "ჯორჯიან უოთერ ენდ ფაუერის" დირექტორის მრჩეველმა ეკა ბერიძემ.