საიამ პოლიციელთა მხრიდან ძალადობის ფაქტები გამოააშკარავა

საზოგადოება - 15:14, 29 Jan, 2014

1490

ახალგაზრდა იურისტთა ასოციაციამ პოლიციის მხრიდან მოქალაქეების მიმართ დაფიქსირებული ძალადობის ფაქტები წარადგინა.
როგორც დღეს გამართულ საგანგებო ბრიფინგზე გახდა ცნობილი, პოლიციის მხრიდან ადგილი ჰქონდა არა მხოლოდ ცემასა და ძალადობას, არამედ არაადამიანურ მოპყრობასა და წამებასაც.საიას ხელმძღვანელი შსს-ს უმოქმედებაში ადანაშაულებს.
"ჩვენ არაერთხელ გვისაუბრია პოლიციელთა მხრიდან ჩადენილ დანაშაულზებზე. ჩვენს მიერ გაკეთებულ განცხადებებთან დაკავშირებით არც ერთ კონკრეტულ შემთხვევაში სათანადო რეაგირება არ მომხდარა უმეტეს შემთხვევაში გამოძიება არც დაწყებულა", - განაცხადა საიას ხელმძღვანელმა კახა კოჟორიძემ.
საია–ში დღეს გამართულ ბრიფინგს ერთ–ერთი დაზარალებულიც ესწრებოდა, რომელმაც პოლიციის მხრიდან მასზე განხორციელებულ ძალადობაზე თავად ისაუბრა. დაზარალებულ შიო კობიძის ინფორმაციით, ის პოლიციამ მეგობართან ერთად თაბუკაშვილის ქუჩაზე მდებარე პოლიციის შენობაში წაიყვანა. „მანქანაში ჩამსვეს და ჯერ იქ მცემეს მაგრად, მერე თაბუკაშვილზე ჩამიყვანეს, ოპერის უკან მთელი ღამის განმავლობაში მაგინებდნენ და მცემდნენ. ჩემი მეგობარი დაკავებული არ იყო, მას უბრალოდ აყურებინებდნენ, როგორ მცემდნენ და მაწამებდნენ. მერე დაინახეს, რომ კისერში ჭრილობა მქონდა, იქ დაიწყეს პასტით დაჭერა და ასე მაწამებდნენ“, – განაცხადა შიო კობიძემ.