მანდატურები ხელმძღვანელობისგან კონკრეტულ პასუხებს ითხოვენ. რამდენიმე ათეული მანდატური "მანდატურის საგანმანათლებო სამსახურის ცენტრთან" შეიკრიბა. როგორც მანდატურები აცხადებენ, ხელისუფლებას მათი სამსახურის გაუქმება აქვს განზრახული. ისინი განათლების სამინისტროსგან გარანტიებს ითხოვენ, წინააღმდეგ შემთხვევაში ხვალიდან სამსახურში აღარ ივლიან.

"იმდენადაც კი არ გვცეს პატივი, რომ ჩვენთვის ორი დღით ადრე შეეტყობინებინათ ამ ცვლილების შესახებ. დღეს მოგვწერეს, რომ ჩვენი კუთვნილი ინვენტარი, ფორმები და რაციები უნდა ჩაგვებარებინა. არავინ არაფერს გვეუბნება, როდის ავიღებთ იანვრის ხელფასს და საერთოდ, დიდ ინფორმაციულ ვაკუუმში ვართ. ხელისუფლება ამ სამსახურის გაუქმებას აპირებს", - აცხადებენ მანდატურები

მანდატურების თქმით, რამდენიმე საათის წინ მიიღეს შეტყობინება სადაც მათ მადლობას უხდიდნენ გაწეული სამუშაოსთვის და ატყობინებდნენ, მანდატურის სამსახური გაუქმდა. განათლების სამინისტრო ამ დრომდე ამ საკითხთან დაკავშირებით კომენტარს არ აკეთებს.