სასჯელაღსრულების სამინისტრო „კვირის პალიტრას“ არასწორი ინფორმაციის გავრცელებაში ადანაშაულებს

საზოგადოება - 19:53, 27 Jan, 2014

2008

სასჯელაღსრულებისა და პრობაციის სამინისტრო მსჯავრდებულ არჩილ ძეგველიშვილთან დაკავშირებით განმარტებებს აკეთებს.

საქმე ეხება „კვირის პალიტრაში“ გამოქვეყნებულ მასალას, სადაც მსჯავრდებული ვადამდე გათავისუფლებას მოითხოვდა და აცხადებდა, რომ შიმშილობს.

როგორც სამინისტროს განცხადებაშია ნათქვამი, პუბლიკაცია სამინისტროსთან კონტაქტის გარეშე მომზადდა, რის გამოც ავტორმა არასწორი ინფორმაცია გაავრცელა.

„მსჯავრდებულმა ჯერ კიდევ საგაზეთო მასალის გამოქვეყნებამდე, 26 იანვარს შეწყვიტა შიმშილობა. შიმშილობის პეიროდში არჩილ ძეგველიშვილი სამედიცინო და სასჯელაღსრულების დეპარტამენტების წარმომადგენლების მუდმივი მეთვალყურეობის ქვეშ იმყოფებოდა. 25 იანვარს ის მინისტრის წარმომადგენელმაც მოინახულა, რის შემდეგაც მსჯავრდებულმა შიმშილობის შეწყვეტის გადაწყვეტილება მიიღო, რაც შეეხება პირობით ვადამდე გათავისუფლების მექანიზმს, ადგილობრივი საბჭო არის სრულიად დამოუკიდებელი ორგანო, რომლის 5-წევრიან შემადგენლობაში, სამინისტროს ცენტრალური აპარატისა და პრობაციის ეროვნული ბიუროს ორი წარმომადგენლის გარდა, არასამთავრობო ორგანიზაციის, ქალაქის მერიისა და იუსტიციის უმაღლესი საბჭოს წარმომადგენლებიც შედიან. მსჯავრდებულის პირობით ვადამდე გათავისუფლების გადაწყვეტილება კი ხმათა უმრავლესობით მიიღება. სამინისტრო და მინისტრი საბჭოს გადაწყვეტილებებში ცხადია ვერ ჩაერევა,“ - ნათქვამია სამინისტროს განცხადებაში.