კომპანია "პიონერი" სათესლე სიმინდთან დაკავშირებით განცხადებას ავრცელებს

საზოგადოება - 14:37, 26 Nov, 2012

557

და ოფიციალური წერილის საშუალებით განმარტებას აკეთებს, რომელსაც ,,ნიუპოსტი" უცვლელად გთავაზობთ:

"როგორც საქართველოში "პიონერის" ოფიციალურ დისტრიბუტორ კომპანია "კარტლისში" აცხადებენ, ტელეკომპანია "კავკასიით", გადაცემა "სპექტრის" ეთერში პიონერის სათესლე სიმინდის შესახებ მრავალ სხვა მცდარ ინფორმაცისთან ერთად ნათქვამი იყო, რომ საქართველოში აღნიშნული სიმინდი ჰოლოგრამიანი შეფუთვის გარეშე იყიდება, რამაც მოსახლეობა შეცდომაში შეიყვანა. კომპანიის წარმომადგენლების ცნობით, წერილში განმარტებულია, რომ საქართველო იმ ქვეყნების რიცხვს არ განეკუთვნება, რომლებიც ფალსიფიკაციის რისკფაქტორების ჯგუფს განეკუთვნებიან. შესაბამისად, საქართველოს ბაზარზე სათესლე სიმინდი ჰოლოგრამიანი შეფუთვით არ შემოდის. სიმინდი ჰოლოგრამიანი შეფუთვით მხოლოდ იმ ქვეყნებისთვის მზადდება, სადაც მათი ფალსიფიკაციის საფრთხე არსებობს. ასეთი ქვეყნებია მაგალითად, რუსეთი და უკრაინა. სათესლე მარცვლეულის ჰიბრიდები მთელ მსოფლიოში ევროპასა და ამერიკაში მდებარე ქვეყნებში იწარმოება, მათ შორის, კანადაში, აშშ-ში, თურქეთში, ხორვატიასა და სხვა ქვეყნებში. ამ ქვეყნებში მდებარე ქარხნებში სიმინდის სხვადასხვა ჰიბრიდს ვაწარმოებთ. ჰოლოგრამიანი შეფუთვით საქართველოსა და ევროპის ბაზრებზე სათესლე მასალა მხოლოდ იმ შემთხვევაში შემოგვაქვს, როცა იმავე ჰიბრიდულ ჯიშს რისკფაქტორის მქონე ქვეყნებისთვისაც ვაფასოებთ. ასეთ დროს მთელი პარტია ჰოლოგრამიან შეფუთვაში ფასოვდება და ყველა ქვეყანაში რისკფაქტორის ჯგუფშია იგი თუ არა, ასეთი დაფასოებით ვრცელდება," - აცხადებენ კომპანია "პიონერის" მენეჯმენტში.

მათივე ინფორმაციით, უახლოეს ხანებში საქართველოს "პიონერის" შვეიცარიის ოფისის სახელმწიფოსთან და საზოგადოებასთან ურთიერთობის მენეჯერი პაოლო მარჩესინი ეწვევა, შექმნილ ვითარებას ადგილზე გაარკვევს და ამ საკითხთან დაკავშირებით კომპანიის მოსაზრებას საზოგადოებას გააცნობს.

გარდა ამისა, ,,პიონერი" ოფიციალური პოზიციის დაფიქსირებას მედიის საშუალებით გეგმავს. მათ უკვე შეადგინეს ოფიციალური წერილი, რომელიც ქართულ პრესასა და მედიაშიც გამოქვეყნდება. წერილში დეტალურადაა განმარტებული, თუ როგორ და რა მექანიზმით ხდება პროდუქციის ჰოლოგრამიან შეფუთვაში დაფასოება და რატომ არის გადაცემაში მოყვანილი ფაქტები მცადრი.

,,რაც შეეხება კომპანია ,,კარტლისის" პოზიციას, მიგვაჩნია, რომ ასეთ სპეციფიურ საკითხებზე კომპეტენტურმა ადამიანებმა უნდა ისაუბრონ და არ უნდა მისცენ თავს უფლება მცდარი ინფორმაციით მოსახლეობა შეცდომაში შეიყვანონ. თუ მათ სურთ, რომ მართლაც ობიექტურად იმსჯელონ, შეუძლიათ ასეთ საკითხზე კონსულტაციისთვის მოგვმართონ ან ჩვენ, ან თვითონ კომპანია ,,პიონერის" შვეიცარიის ოფისს, რომელიც საქართველოს კურირებს და რომელიც ლუგანოში მდებარეობს და არა რუსეთში, როგორც ეს გადაცემაში ითქვა", - აცხადებს კომპანია "კარტლისის" დირექტორი რობერტ რევია.

ცნობისთვის, კომპანია ,,კარტლისი" (ყოფილი "გარემო და ანალიტიკა") 1997 წელს დაარსდა და სოფლის მეურნეობაში არსებული ყველა მიმართულებით მუშაობს. კერძოდ, სათესლე მასალა, სასუქები, მცენარეთა დაცვის საშუალებები, საირიგაციო სისტემები, სასოფლო-სამეურნეო კულტურების წარმოება. ამ დროისთვის იგი თანამშრომლობს სოფლის მეურნეობის მიმართულების ისეთ მსოფლიო ბრენდებთან როგორებიცაა: DuPont, Pioneer, Bejo, TimacAgro და Stet Holland. კომპანიას გააჩნია ფერმერთა მომსახურების ცენტრები და სავაჭრო ობიექტები საქართველოს სხვადასხვა რეგიონში მათ შორის, ლაგოდეხში, ბოლნისში, წნორში, გორში, ზუგდიდში და სხვა რაიონულ ცენტრებში.

,,კარტლისი" ამერიკული კომპანია "დიუპონის" ჯილდოს "ENVIRONMENTAL RESPECT AWARDS"-ის მფლობელია. კომპანიას ჯილდო პესტიციდების დისტრიბუციის საუკეთესო მენეჯმენტისთვის გადაეცა. დაჯილდოება აშშ-ის დედაქალაქ ვაშინგტონში კაპიტოლიუმის შენობაში გასული წლის ზაფხულში შედგა.