ამასთან, უკვე ცნობილია, რომ სოსო ჩიქობავა კონტროლის პალატის ყოფილი თანამშრომელია და 2011 წლის სექტემბერ-ოქტომბრიდან ის "გურიანიუსთან" თანამშრომლობდა. კერძოდ, კონტროლის პალატაში არსებული კანონდარღვევების შესახებ ინფორმაციას აწვდიდა.

როგორც "გურია ნიუსის" წარმომადგენელი აცხადებს, ბოლო პერიოდში მისი ელექტრონული ფოსტის "გატეხვას" ვიღაც ცდილობდა, ასევე სოციალურ ქსელ Facebook-ზე მისი გვერდის კლონი შექმნეს.

წინასწარი ინფორმაციით, ჩიქობავას მაკაროვის სისტემის იარაღიდან 6-ჯერ ესროლეს. სავარაუდოდ, მომხდარია საკონტროლო გასროლაც, ვინაიდან გარდაცვლილს ტყვია თავშიც აქვს მოხვედრილი.

რაც შეეხება მკვლელობის სავარაუდო მიზეზებს და მოტივებს, როგორც მკვლელობის შემსწრეები საუბრობენ, ჩიქობავა მკვლელობამდე რამდენიმე წუთით ადრე მათთვის უცნობ მამაკაცთან საუბრობდა, რომელიც შემდეგ კამათში გადაიზარდა.

სავარაუდოდ, გარდაცვლილსა და უცნობ მამაკაცს შორის საუბარი უკავშირდებოდა სახლს, რომელზეც მათ დავა ჰქონდათ.

ასევე, ცნობილია, რომ სოსო ჩიქობავას ამ კონკრეტულ სახლთან დაკავშირებით სასამართლო დავა ჰქონდა, რომელიც წარმატებით დასრულდა და სავარაუდოდ, უცნობი მამაკაცი იყო ის, ვისაც ჩიქობავამ სასამართლოში მოუგო.

მომხდარ ფაქტთან დაკავშირებით, გამოძიება სისხლის სამართლის კოდექსის 108-ე მუხლითაა აღძრული, რომელიც განზრახ მკვლელობას გულისხმობს.