საქართველოს პრემიერ-მინისტრის უსაფრთხოებისა და კრიზისების მართვის საბჭოს მდივნად მინდია ჯანელიძე დაინიშნა. აღნიშნულ ინფორმაციას ირაკლი ღარიბაშვილის პრესსამსახური ავრცელებს.

პრესსამსახურის ცნობით, საქართველოს პრემიერ-მინისტრის უსაფრთხოებისა და კრიზისების მართვის საბჭოს დებულების თანახმად, პრემიერ-მინისტრის თანაშემწე სახელმწიფო უსაფრთხოების საკითხებში – სახელმწიფო უსაფრთხოებისა და კრიზისების მართვის საბჭოს მდივანი სამსახურებრივი მოვალეობის შესრულებისას ანგარიშვალდებულია მხოლოდ პრემიერ-მინისტრის წინაშე.

საბჭოს მდივანი უზრუნველყოფს საბჭოს მუშაობის ორგანიზებას; ხელმძღვანელობს საბჭოს აპარატს; პრემიერ-მინისტრს დასამტკიცებლად წარუდგენს საბჭოს აპარატის სტრუქტურასა და საშტატო განრიგს, აპარატისა და მისი სტრუქტურული ერთეულების დებულებებს; ამზადებს საბჭოს სხდომებს; აკონტროლებს სახელმწიფოს თავდაცვისა და უშიშროების საკითხებზე პრემიერ-მინისტრის გადაწყვეტილებების შესრულებას; საჭიროების შემთხვევაში, პრემიერ-მინისტრს წარუდგენს წინადადებებს დროებითი უწყებათაშორისი სამუშაო ჯგუფების შექმნის შესახებ; კოორდინაციას უწევს საბჭოს მიერ შექმნილი დროებითი უწყებათაშორისი სამუშაო ჯგუფების საქმიანობას; თავისი კომპეტენციის ფარგლებში ხელს აწერს სამსახურებრივ დოკუმენტებს; დადგენილი წესით ასრულებს პრემიერ-მინისტრის ცალკეულ დავალებებს.