საქართველოს კულტურისა და ძეგლთა დაცვის სამინისტროში, საქართველოს კულტურის პოლიტიკის კონცეფციის პრეზენტაცია გაიმართა. ღონისძიებას საქართველოს კულტურისა და ძეგლთა დაცვის მინისტრი გურამ ოდიშარია, მინისტრის მოადგილეები, ევროპულ და ევროატლანტიკურ სტრუქტურებში სახელმწიფო მინისტრის მოადგილე მარიამ რაქვიაშვილი და სხვა მოწვეული სტუმრები დაესწრნენ.

საქართველოს კულტურის პოლიტიკის კონცეფცია კულტურისა და ძეგლთა დაცვის სამინისტროს ინიციატივით შემუშავდა. კონცეფციის შექმნის აუცილებლობა განაპირობა იმ გარემოებამ, რომ სამინისტროს ამ დრომდე არ ჰქონია კულტურის მკაფიოდ ჩამოყალიბებული სახელმწიფო პოლიტიკისა და განვითარების სტრატეგიული მიმართულებები, რამაც უნდა უზრუნველყოს კულტურის განვითარების პროცესის მდგრადობა.

გასული წლის ივლისში მინისტრის ბრძანებით შექმნილმა კულტურის პოლიტიკისა და სტრატეგიის შემუშავების დროებითმა კომისიამ, რომლის წევრთა შემადგენლობა შერჩეული იქნა მათი საექსპერტო კვალიფიკაციის გათვალისწინებით, შეიმუშავა ფუძემდებლური დოკუმენტი, რომელიც ადგენს კულტურის პოლიტიკის ღირებულებებსა და ძირითად მიმართულებებს. კონცეფცია საფუძვლად დაედება საქართველოში კულტურის პოლიტიკის გრძელვადიანი სტრატეგიის შემუშავებასა და მისი შესრულების დაგეგმვას, ასევე სამინისტროს მიერ გამოყენებული იქნება შესაბამისი ინსტიტუციური და სტრუქტურული რეფორმების გასატარებლად.

საქართველოს კულტურის პოლიტიკის კონცეფციის შემუშავება ხელს შეუწყობს საქართველოში მიმდინარე ევროინტეგრაციის პროცესებს, ვინაიდან ევროკავშირთან ასოცირების შეთანხმება საქართველოს აკისრებს მთელ რიგ ვალდებულებებს კულტურის სფეროშიც, მათ შორის, საქართველოსა და ევროკავშირს შორის კულტურის პოლიტიკის შესახებ დიალოგის წარმოების მიმართულებით.

ღონისძიება წარმოადგენს ევროინტეგრაციის საკითხთა კომუნიკაციისა და ინფორმაციის შესახებ 2014-2017 წლებისათვის სტრატეგიის 2014 წლის სამოქმედო გეგმის ნაწილს, რომლის ძირითადი მიზანია საქართველოს მოსახლეობის ინფორმირება ევროინტეგრაციის პროცესთან დაკავშირებულ შესაძლებლობებსა და ქვეყნის მიერ ნაკისრ ვალდებულებებზე.