პროკურატურა განცხადებას ავრცელებს, რომელშიც აღნიშნულია, რომ თბილისის ტელეანძაზე გარეგანათებისა და საჰაერო ნავიგაციისათვის განკუთვნილი შუქურის გათიშვა დანაშაულის ნიშნებს შეიცავს.

უწყების განმარტებით, საფრთხე შეექმნა საჰაერო ხომალდების უსაფრთხოებას ფრენის დროს. უკვე ამ მიმართულებით კი, გამოძიება სისხლის სამართლის კოდექსის 227-ე მუხლის მე-3 ნაწილით მიმდინარეობს.

"მედიის საშუალებებით გავრცელებული ინფორმაციის თანახმად, თბილისის მერიის გადაწყვეტილებით, თბილისის ტელეანძაზე გაითიშა გარეგანათება და საჰაერო ნავიგაციისათვის განკუთვნილი შუქურა, რითაც შესაძლოა, ვერ იქნას უზრუნველყოფილი უსაფრთხო ფრენა. ვინაიდან, მასმედიით გავრცელებული ინფორმაცია შეიცავს დანაშაულის ნიშნებს, საქართველოს მთავარი პროკურატურის საგამოძიებო ნაწილში დაიწყო გამოძიება სამსახურებრივი უფლებამოსილების ბოროტად გამოყენების მუხლით, გათვალისწინებული სისხლის სამართლის კოდექსის 332-ე მუხლის პირველი ნაწილით", - ნათქვამია განცხადებაში. პროკურატურაში დაკითხვაზე უკვე იმყოფება შპს "სინათლის ქალაქის" დირექტორი ნიკა ტოგონიძე.

როგორც დედაქალაქის მერიაში აცხადებენ ანძის გათიშვა არ უკავშირდება საჰაერო ნავიგაციას და მას არ შეეძლო რაიმე სახის საფრთხე გამოეწვია.