აღნიშნულის შესახებ განცხადება ბორჯომის მუნიციპალიტეტის გამგებელმა გააკეთა.

მისი თქმით, მიწის მფლობელს, სადაც ის კონსტრუქციის მშენებლობას გეგმავდა, ბორჯომის მუნიციპალიტეტის გამგეობისთვის შესაბამისი ნებართვის მოთხოვნით არ მიუმართავს. დიმიტრი ბერიძის განმარტებით, მიმართვის შემთხვევაშიც, არანაირი ნებართვის გაცემა არ იგეგმება.

როგორც გამგებელი აცხადებს, ბორჯომის მუნიციპალიტეტის ბიუჯეტიდან გამოიყოფა თანხა, რათა ქუმარიტაშვილის საფლავთან მოეწყოს მისი სახელობის სკვერი.

ნოდარ ქუმარიტაშვილის საფლავთან და მემორიალთან ახლოს გასართობი ატრაქციონის მშენებლობა რამდენიმე დღის წინ დაიწყო. სპორტსმენის ოჯახის წევრებისა და ადგილობრივების პროტესტის შედეგად, ბაკურიანის გამგეობამ მშენებლობა შეაჩერა.

ვანკუვერის ზამთრის ოლიმპიურ თამაშებზე ტრაგიკულად დაღუპული 21 წლის ნოდარ ქუმარიტაშვილის ოჯახი კიდევ ერთ პრობლემაზე საუბრობს. მათი თქმით, თუ ეკლესიის ტერიტორია, სადაც სპორტსმენია დაკრძალული, არ შემოიღობება და არ მოწესრიგდება, ოჯახი იძულებული გახდება, სპორტსმენი სხვაგან გადაასვენოს. დავით ქუმარიტაშვილი აცხადებს, რომ 4 წელია მიმდებარე ტერიტორია ავტომობილების სადგომად და პირუტყვის საძოვრად გამოიყენება.