თბილისის საქალაქო სასამართლოში გიგი უგულავასა და დავით კეზერაშვილის სასამართლო პროცესი გადაიდო. აღნიშნულის შემდეგ, თბილისის უფლებამოსილებაშეჩერებულმა მერმა ჟურნალისტებისთვის კომენტარი გააკეთა და აღნიშნა, რომ ხელისუფლება ყველაფერს აკეთებს, რომ მას პოლიტიკურ აქტიურობაში, მოახლოებული არჩევნებიდან გამომდინარე, ხელი შეუშალოს:

"მოწმემ ისაუბრა იმ პირობებზე, რომელშიც იგი დაკითხეს. ეს ძალიან მნიშვნელოვანია და კარგად გამოხატავს დღევანდელი ფინანსური პოლიციისა და პროკურატურის მუშაობას. მოწმეს ტელეფონით შეატყობინეს და დაიბარეს სულ სხვა შენობაში - მოდულში.

არ უთხრეს, რაზე აყურყუტეს ორი საათის განმავლობაში. შემდეგ უკანა კარიდან გაიყვანეს და სხვა ხალხმა ჩაისვა მანქანაში და გადაიყვანეს ფინანსურ პოლიციაში. ეს ხდებოდა ღამით, 12 საათის შემდეგ. ეს გარემოება მაშინვე გავასაჩივრეთ, იმიტომ, რომ ეს ნიშნავს ადამიანის დატყვევებას. მიუხედავად ყველა ამ წინაპირობისა და პრობლემისა, დღევანდელი ჩვენებიდანაც კარგად ჩანდა, რომ ეს არის აბსოლუტურად ერთმანეთისგან განსხვავებული საქმე – "ტელეიმედის" საკითხი და რიყის გასხვისების საკითხი.

ვერც ერთი მოწმე ვერ და არ საუბრობს იმაზე, რომ რაიმე დანაშაულის შემცველი იყო რომელიმე გადაწყვეტილება ამ საკითხზე. ეს ნათლად ადასტურებს იმას, რომ პროცესები, რომელიც ჩვენს ირგვლივ მიმდინარეობს არის აბსოლუტურად პოლიტიკური. მას აქვს მხოლოდ ერთადერთი ამოცანა, რომ ჩამომაშოროს საქმიანობას და შემიზღუდოს პოლიტიკური აქტიურობის შესაძლებლობა. განსაკუთრებით ადგილობრივი არჩევნების გზით და ეს უფრო და უფრო ნათელი ხდება სასამართლო სხდომამდე", - განაცხადა გიგი უგულავამ.