მედიაკავშირმა „ობიექტივმა“ რამდენიმე წუთის წინ პირდაპირ ეთერში ჩართო სტუდია, სადაც ჟურნალისტ ირმა ინაშვილის სტუმარი ყოფილი პატიმარი და სკანდალური აღიარების ავტორი გოდერძი ჯოლოხავა იყო.

ირმა ინაშვილთან საუბარში ამჯერად ჯოლოხავა აცხადებს, რომ თავდაპირველი ინტერვიუ, სადაც პატიმართა წამების შესახებ საუბრობდა, „ახალაიას ხალხის მხრიდან“ ზეწოლის შედეგად შეცვალა.

ირმა ინაშვილის თქმით, ჯოლოხავა, რომლის ადგილსამყოფელის შესახებ არაფერი იცოდა და მხოლოდ ვარაუდობდა, რომ მასზე ზეწოლა განხორციელდა, სმს-ით დაუკავშირდა ადვოკატ ჯუმბერ მილორავას და შემდეგ თავად ჟურნალიტს, რის შემდეგაც პირდაპირი ეთერი დაიგეგმა.

გოდერძი ჯოლოხავა აცხადებს:

„იყო მუქარები შვილისა და ძმისშვილების მისამართით, რომ ცოტა ხანში არცერთი ცოცხალი არ მეყოლებოდა. გიგი კალანდაძე და ვინმე რუსლანი მემუქრებოდა. მე დავთანხმდი, რომ თუ არ იქნებოდა საფრთხე, მე ისე ვისაუბრებდი, როგორც მათ მითხრეს. ინტერვიუ ახალაიას მეუღლემ ჩაიწერა და კითხვებს გიორგი ონიანი მისვამდა.

გოდერძი ჯოლოხავა აცხადებს, რომ ჩვენების შეცვლის გამო არანაირი ანაზღაურება არ მიუღია და გადაწყვეტილება „ახალაიას ხალხის“ ზეწოლისა და მუქარების შედეგად მიიღო:

„მათ მე ისეთი საბუთები მაჩვენეს, რომლითაც დამარწმუნეს, რომ ამ ხელისუფლებაშიც ჰყავდათ ხალხი და შემეშინდა“, - აცხადებს ჯოლოხავა „ობიექტივის“ პირდაპირ ეთერში.

გოდერძი ჯოლოხავას თქმით, ოდესაში გამგზავრება „ახალაიას ხალხმა“ აიძულა, ბილეთი აუღო და გაამგზავრა, იქ კი „მათი კაცი“ დახვდა:

„ოდესაშიც იმათი კაცი იყო, ოღონდ მე არ ვიცი სახელი და გვარი, ვინ იყო. ბინა მათ მიქირავეს და პერიოდულად მაწვდიდნენ თანხას, ჩემი პასპორტი კი მათ ჰქონდათ“, - აცხადებს გოდერძი ჯოლოხავა. მისი თქმით, საქართველოში აგვისტოში ჩამოვიდა.