13 იანვარს, საქართველოს რეგიონული განვითარებისა და ინფრასტრუქტურის მინისტრი დავით ნარმანია პრესკონფერენციას გამართავს და მედიას საქართველოს რეგიონებში განსახორციელებელი პროექტების ფონდიდან 2014 წლისთვის დაფინანსებული პროექტების შესახებ ინფორმაციას მიაწვდის.

პროექტებს მუნიციპალიტეტები და გუბერნატორები შეიმუშავებენ, თავადვე განსაზღვრავენ პრიორიტეტებს, ხოლო მათი დაფინანსება სახელმწიფო ბიუჯეტიდან ხდება. რეგიონული განვითარების სამთავრობო კომისიამ, რომელიც პროექტების შერჩევას ახდენს, პირველი ეტაპის სამუშაოები უკვე დაასრულა და პროექტები საქართველოს მთავრობას დასამტკიცებლად წარუდგინა.

მიმდინარე წელს რეგიონებში განსახორციელებელი პროექტების ფონდით დასაფინანსებელი პროექტებიდან პრიორიტეტულად გამოიყო გზის საფარის მოწესრიგება, წყალმომარაგებისა და საკანალიზაციო სისტემის გამართვა, ეზოების კეთილმოწყობა, საფეხბურთო სტადიონების, საფეხმავლო ბილიკების, საბავშვო ბაღებისა და სხვა შენობების რეაბილიტაცია, ამხანაგობების მიერ შემუშავებული წინადადებების თანადაფინანსება და სხვა.

პრესკონფერენცია რეგიონული განვითარებისა და ინფრასტრუქტურის სამინისტროში 13:00 საათზე დაიწყება.