პროტოპრესვიტერმა გიორგი ზვიადაძემ“საზოგადოებრივი მაუწყებლის“ პირდაპირ ეთერში პატრიარქის ეპისტოლეში სუროგაციის გზით გაჩენილ ბავშვებთან დაკავშირებით არსებულ განცხადებაზე განმარტება გააკეთა. მისი თქმით, ეს არ არის პატრიარქის პირადი დამოკიდებულება, ან მისი გამოგონილი, რომ სუროგაციის გზით შვილის გაჩენა უკავშირდება ცოდვას იმ ადამიანების მხრიდან, რომლებიც ამას აღასრულებენ – იქნება ეს ბიოლოგიური დედა, სუროგატი დედა, თუ სხვა ნებისმიერი პირი, რომელიც ამაში ჩართულია:

“სუროგატობა, როდესაც შეხება გვაქვს ისეთ მდგომარეობასთან, რომ ერთი სრულფასოვანი დედის ნაცვლად ბავშვს შეიძლება ჰყავდეს გენეტიკური დედა, შეიძლება ჰყავდეს სუროგატი დედა, შეიძლება ჰყავდეს კიდევ დედა, რომელიც მისთვის კვერცხუჯრედების რაღაც ნაწილს გაიღებს, ეს არის უდიდესი აღრევა. ცოლ-ქმრობა ქორწინება უდიდესი საიდუმლოა. ყველა ადამიანი ღვთის ხატი და მსგავსია, უნიკალურია.

ყველა ადამიანი დგას უდიდესი პასუხისმგებლობის ქვეშ, ყველა ადამინისთვის ძალიან მნიშვნელოვანია იმ გზით მოვლინება ქვეყანაზე, რომელი გზაც ნაკურთხია ღვთის მიერ, რაც გულისხმობს მშობლეთა მიერ შვილის მოვლინებას ღვთის მიერ დადგენილი წესით. ამდენად ეპისტოლეში ნათქვამი იყო სრულიად გასაგებად და ცხადად და ჩვეთვის გაუგებარია, თუ რატომ გაჩნდა ამასთან დაკავშირებით უკამაყოფილება.

ძალიან მნიშვნელოვანია ის, რომ საეკლესიო სწავლება მთელი სიცხადით და სიმართლით იყოს მიტანილი მრევლამდე, ასევე მოსახლეობისადმი. ეს არის მიმართვა მრევლისადმი. ამგვარი დარიგება ყოველთვის გულისხმობს საზოგადოების, კონკრეტული ადამიანების დაცვას ამ ცოდვისგან. ბევრი შემიძლია ვისაუბრო იმასთან დაკავშირებით, თუ რა მძიმე ტვირთია ეს სუროგატი დედისთვის, იმ ადამიანებისთვის, რომლებიც სარგებლობენ სოციალურად დაუცველი ადამიანის მდგომარეობით და სთავაზობენ მას სოლიდურ თანხას, რომ ისინი სუროგატი დედები გახდნენ”, - განაცხადა ზვიადაძემ.