გლდანის ივერიის ყოვლადწმიდა ღმრთისმშობლის ეკლესიის წინამძღვარი, ბასილ მკალავიშვილი უშიშროების ყოფილ მდივანს გიგა ბოკერიას ანტიმართლმადიდებლური ორგანიზაციის მფარველს უწოდებს და მის დაპატიმრებას ითხოვს. ამის შესახებ ბასილ მკალავიშვილი ინტერვიუში საუბრობს, რომელსაც გაზეთი ,,საქართველო და მსოფლიო“ აქვეყნებს.

„დაახლოებით 4 თვის წინ ინტერვიუში განვაცხადე, რომ მაისში ღვთისმგმობი რამ მოხდებოდა. გიგა ბოკერია, მართლმადიდებლობის დაუძინებელი მტერი, რომელსაც ბოროტების მეტი არაფერი უკეთებია ერისთვის, ახლა თუ უზნეო ე. წ. საზოგადოების მოძრაობას ჩაუდგებოდა სათავეში, ვერ წარმოვიდგენდი. ამჟამად ბოკერიასა და მისი ცოლის მიზანი იყო, საქართველოში დიდი პროვოცირება გამოეწვიათ. კერძოდ, ჩაეტარებინათ მამათმავლების, ლესბოსელებისა და სხვა ჯგუფების ზნედაცემულთა აღლუმი, შემდეგ კი წარედგინათ მოთხოვნა ერთსქესიანთა ქორწინების დაკანონებასთან დაკავშირებით. „ნაცმოძრაობის“ ოფისში დაიგეგმა ყველაფერი. მათი დიდი სურვილით, „სისხლი უნდა დაიღვაროს, ძალიან გვაწყობს თუ მსხვერპლი იქნება“. ამით შეილახებოდა ახალი მთავრობის იმიჯი მსოფლიოს წინაშე“, - ამბობს მკალავიშვილი.

მისი თქმით, ლგბტ-ს წევრების აქციაზე გიგა ბოკერია აქტივისტებს დირექტივებს აძლევდა.

,,ბოკერიას გეგმით, მათ რუსთაველის პროსპექტი უნდა გამოევლოთ და თავიანთ გარყვნილ წარმოდგენას დაასრულებდნენ მთავრობის სახლის წინ, იქ, სადაც 9 აპრილს ნიჩბებით დაჩეხილი ადამიანების სისხლი დაიღვარა. ღვთის განგებით, მათ ვერაფერი მოახერხეს. მსხვერპლიც არ იყო. დღის ბოლოს, ბოკერიას ბრძანებით, ჩვენს მრევლში შემოგზავნეს სამი პიროვნება. სამთავეს ყველგან საყურეები ეკეთათ, ენაზეც კი. ისინი მრევლთან კონფლიქტში შედიოდნენ. იქ იდგნენ სხვა ახალგაზრდებიც, რომელთაც მათ მიაგეს საკადრისი, ხოლო პოლიციამ ისინი მეტროში შეიყვანა და გააპარა. ეს კადრები ტელევიზიით იხილა საზოგადოებამ.

კატეგორიულად მოვითხოვ, ამდენი არეულობისა და ბოროტების ჩამდენი ბოკერია ჩამოშორდეს საზოგადოებას. იგი უნდა დააპატიმრონ, რათა პასუხი აგოს მართლმსაჯულების წინაშე. წინააღმდეგ შემთხვევაში ის ბევრ უსიამოვნებას მოუტანს ჩვენს ქვეყანას“, - აცხადებს მკალავიშვილი.