ამ დროისთვის თბილისის მერისთან ათობით ადამიანია შეკრებილი, რომლებიც აცხადებენ, რომ ქალაქის მთავარ პარკში სასტუმროს აშენებას და ხეების გაჩეხვას არ დაუშვებენ.

ვაკის პარკში ხეების გაჩეხვასთან დაკავშირებით, კომენტარი გააკეთა თბილისის ვიცე-მერმა სევდია უგრეხელიძემ, რომელმაც აღნიშნა, რომ გაჩეხვით სამუშაოებს კერძო კომპანია საკუთარ ტერიტორიაზე ახორციელებს და მათ აღნიშნულის უფლება აქვთ:

„ეს არ არის სახელმწიფო საკუთრება, ეს არის კერძო საკუთრება, კერძო კომპანია აშენებს სასტუმროს, შემოვიდა განცხადება ცხრა ხის მოჭრის შესახებ და აღნიშნულზე ნებართვა გაიცა“, - განაცხადა სევდია უგრეხელიძემ.

მმართველი გუნდის წარმომადგენლები კი მიიჩნევენ, რომ მსგავსი სამუშაოები დედაქალაქში არ უნდა მიმდინარეობდეს.

ვაკის პარკის ტერიტორიაზე სასტუმროს აშენების და ხეების გაჩეხვის წინააღმდეგია გარემოს დაცვის მინისტრი ხათუნა გოგალაძე.