ადვოკატი რომეო საჯაია პროკურატურაში მომხდარ ინციდენტს დაგეგმილ პროვოკაციას უწოდებს. საჯაია მომხდარს იმ გახმაურებულ პროცესებს უკავშირებს, რომლებზეც ბოლო პერიოდში მუშაობს.

ადვოკატის განცხადებით, იგი პროკურატურაში გაგა მკურნალიძის საქმის მასალების წამოსაღებად იყო დაბარებული რა დროსაც პროკურორი ლევან ბაჩიაშვილი თავს დაესხა. მისივე ინფორმაციით ინციდენტის შემდეგ იგი ექსპერტიზის ბიუროშიც იმყოფებოდა, სადაც მას ექსპერტიზა არ ჩაუტარეს.

მომხდართნ დაკავშირებით პროკურატურაში ჩვენება მისცა ადვოკატმა მალხაზ ველიჯანაშვილმა. იგი საგამოძიებო უწყებაში მოწმის სტატუსით რამდენიმე საათის განმავლობაში იკითხებოდა. საქმის სასწრაფოდ გამოძიებას „ადვოკატთა ასოციაციაც“ ითხოვს.

„მე სხვა პროკურორთან ვიყავი მისული, ეს არ უნდა სცოდნოდა ბაჩიაშვილს, იმიტომ, რომ ვიმყოფებოდი პირველ სართულზე, იგი ჩამოვიდა, ოთახში შემოვიდა, მოგვეპარა უკნიდან და მოგვაყენა ფიზიკური შეურაცხყოფა. ეს იყო წინასწარ დაგეგმილი პროვოკაცია. ისინი ცდილობდნენ ჩემს ჩამოცილებას გარკვეული საქმეებიდან. მოვითხოვ ჩამიტარდეს ექსპერტიზა“, - განაცხადა რომელო საჯაიამ.