სერგი კაპანაძე: აფხაზეთის აღიარების პოტენციური საფრთხეები სოჭის ოლიმპიადაში

პოზიცია - 19:34, 04 Jan, 2014

5323

ამათგან ნაწილი უკვე მოხდა. ნაწილი აუცილებლად მოხდება.

- სოჭში მიმდინარე მშენებლობებისთვის აფხაზური ქვიშის და საშენი მასალების გამოყენება. ეს უკვე მოხდა.

- მას მედიის სარეგისტრაციო ბარათში აფხაზეთი და სამხრეთ ოსეთი მოცემულია როგორც დამოუკიდებელი სახელმწიფოები. ეს უკვე მოხდა.

- ჟურნალისტები გაივლიან აკრედიტაციას როგორც აფხაზეთის და სამხრეთ ოსეთის დამოუკიდებელი სახელმწიფოების ჟურნალისტები. ეს მოხდება.

- სხვა სარეგისტრაციო

- რუსეთის ხელისუფლების ეგიდით ორგანიზებულ ოფიციალურ ღონისძიებებზე მიწვეული იქნებიან აფხაზეთის და სამხრეთ ოსეთის ე.წ. პრეზიდენტები. ეს მოხდება.

- რუსეთის ხელისუფლების ეგიდით, ან სხვა არასახელმწფოებრივი ეგიდით ორგანიზებულ არაოფიციალურ ღონისძიებებზეც მიწვეული იქნებიან აფხაზეთის და სამხრეთ ოსეთის ე.წ. პრეზიდენტები. ეს მოხდება.

- ოფიციალური დელეგაციების გადასაადგილებლად გამოყენებული იქნება აფხაზური სიმბოლიკის მქონე ავტომობილები. ეს უკვე მოხდა.

- აფხაზეთის და სამხრეთ ოსეთის, როგორც დამოუკიდებელი სახელმწიფოების, ასევე მათი სიმბოლიკის, მათ შორის, დროშების რეკლამირება სოჭაში. ეს მოხდება.

- ოფიციალურ დელეგაციებს შესთავაზებენ აფხაზეთში გასეირნებას/ტურებს. ეს მოხდება.

- აფხაზეთის და სამხრეთ ოსეთის რეკლამირება სხვადასხვა სახის ნაბეჭდ პროდუქციაში, რომელიც დარიგდება ოლიმპიადის დროს. ეს მოხდება.

- აფხაზეთის და სამხრეთ ოსეთის ე.წ. ხელისუფლების წარმომადგენლების კონტაქტი, ძირითადად არაფორმალურ გარემოში (მიღებები, ა.შ.) სხვადასხვა სახელმწიფოების წარმომადგენლებთან, თანმდევი მედია გაშუქებით. ეს მოხდება.

ბუნებრივია, რუსეთის წარმომადგენლები გვეუბნებიან, რომ აფხაზეთი და სამხრეთ ოსეთი არ მიიღებენ მონაწილეობას ოლიმპიადაში და მის ფორმალურ ნაწილებში. ეს ალბათ ასეც იქნება, რადგან ოლიმპიური თამაშების ოფიციალურ ღონისძიებებში მხოლოდ საერთაშორისო ოლიმპიური კომიტეტის წევრებს შეუძლიათ მონაწილეობის მიღება. მაგრამ ზემოთ ჩამოთვლილ ეპიზოდებში დარწმუნებული ვარ იქნება აფხაზეთის და სამხრეთ ოსეთის დამოუკიდებლობის ლეგიტიმაციის მცდელობები.

ამაზე რას ვიტყვით?

საქართველოდან ოფიციალური დელეგაცია რომ არ ჩადის, ეს კარგია. მაგრამ ოლიმპიური ნაკრების ისეთ ღონისძიებაში მონაწილეობით, რომელშიც ყველაფერი ზემოთ თქმული იქნება, რამე ზიანს ხომ არ ვაყენებთ სახელმწიფო ინტერესებს? აი ესაა ის კითხვა, რომელზეც, იმედია ხელისუფლებას აქვს ნათელი პასუხი და ანალიზი.

სერგი კაპანაძე

ექსპერტი, ,,საქართველოს რეფორმების ასოციაციის“ დამფუძნებელი