რუსმა ე.წ. მესაზღვრეებმა საქართველოს კიდევ ერთი მოქალაქე დააკავეს. გორის მუნიციპალიტეტის სოფელ ახრისის მკვიდრი, 23 წლის პაატა არაქელოვი რუსმა ე.წ. მესაზღვრეებმა სოფლიდან წაიყვანეს.

როგორც ,,ნიუპოსტს“ გატაცებულის ოჯახის წევრებმა აცნობეს, 23 წლის ახალგაზრდა 2 დღის განმავლობაში დაკარგული იყო და მათთვის დღეს გახდა ცნობილი, რომ ის რუს ე.წ. მესაზღვრეებს ცხინვალის ციხეში ჰყავთ გადაყვანილი:

„ორი დღე ვეძებდით, არსად არ ჩანდა და დღეს პოლიცია მოვიდა ჩვენთან და გვითხრა, რომ რუსებს დაუჭერიათ. რა გავაკეთოთ არ ვიცით, ჯერ არც გამოსასყიდ თანხას გვთხოვენ.

ახალი წელი მოდის და ცხინვალის ციხეში შეხვდება, იქნებ ვინმე დაგვეხმაროს...“ -აცხადებს დაკავებულის ძმა ჯუმბერ არაქელოვი.

ცხინვალის დე ფაქტო ხელისუფლება, სავარაუდოდ, არაქელოვს საზღვრის უკანონო გადაკვეთის ბრალდებით გაასამართლებს.

გიორგი ახალკაცი, "ნიუპოსტისთვის", გორი.