აღნიშნული განცხადება მერაბიშვილმა "კვირის პალიტრასთან" მიცემულ ინტერვიუში გააჟღერა. მერაბიშვილი კომენტარს საკნიდან მის გაყვანასთან დაკავშირებითც აკეთებს და აცხადებს, რომ ყალბი განცხადების შემთხვევაში ხელისუფლებას შეეძლო მისი მხილება.

"ჩემი ყალბი განცხადება ძალიან ადვილად გაქარწყლდებოდა, ჩემზე კონტროლი ხომ ხელისუფლების ხელშია?", - მიიჩნევს მერაბიშვილი. მისივე თქმით, "ისეთი გულუბრყვილო არ გახლავართ, იმედი მქონოდა, ეს ხელისუფლება სასამართლოს ვერ გააკონტროლებს-მეთქი.

უფრო მეტიც, გამამართლებელი განაჩენის გამოტანის შემთხვევაშიც კი ახალი ბრალდება გამოცხვება და ამჯერად უკვე აღარც ქუთაისის და აღარც რუსთავის სასამართლოში აღარ დასჭირდებათ ჩემი წაყვანა. ამას ვამბობ ბოლო დღეებში თბილისის მერის საქმეზე გამოტანილი გადაწყვეტილების გათვალისწინებით. ხელისუფლება ციხეში მამყოფებს მანამდე, სანამდეც შეძლებს. მისი შესაძლებლობა სასამართლოთი არ არის შეზღუდული, ეს დამოკიდებულია მათ რეიტინგსა და საერთაშორისო კონიუნქტურაზე.