დავით ზურაბიშვილი „ნაციონალური მოძრაობის“ რიტორიკასთან მიმართებაში განიხილავს „კურიერის“ წამყვანის გიორგი გაბუნიას ფრაზას და ამბობს, რომ მსგავსი უადგილო ფრაზები საპასუხო აგრესიას კვებავს და აშკარა პროვნციალიზმშია გადაზრდილი.

ზურაბიშვილი ამ ფრაზასთან მიმართებაში „რეალ.ტვ“-ს და „პრესა.ჯი“-ს, ასევე ალისტრახოს ახსენებს:

„კი მომბეზრდა წინა ხელისუფლებაზე ლაპარაკი, მაგრამ „რუსთავი-2-ის“ ჟურნალისტის დამცინავმა კომენტარმა მთავრობის მიმართ - ისრიალეთ მიშას ნაკვალევზე მესტიაში, მაგრამ ფრთხილად, არ მოსრიალდეთო, ნაცმოძრაობის მომხრე-თანამგრძნობელთა ისეთი საყოველთაო აღფრთოვანება გამოიწვია, არ შემიძლია ამის თაობაზე ორი სიტყვით არ ვთქვა.

სააკაშვილის ხელისუფლება საზოგადოების უმრავლესობისთვის კატეგორიულად მიუღებელი გახდა არა მხოლოდ მისი ტოტალურად ძალადობრივი ხასიათის გამო. არანაკლები მნიშვნელობა ჰქონდა იმას, რომ ეს ძალადობა ხორციელდებოდა ხაზგასმულად ცინიკური და შეურაცხმყოფელი ფორმით.

ადამიანებს თვალნათლივ უნდა დაენახათ რომ დაჩაგრეს, დაამცირეს, მასხრად აიგდეს. არ ვიცი ეს სტილი როგორ და რატომ დამკვიდრდა - სადმე ამოიკითხეს, რომ ასე უნდა ექნათ მეტი ეფექტისთვის, თუ უბრალოდ ეგეთი ბუნებისა იყვნენ, მაგრამ ესეგვარი აროგანტულობა და ცინიზმი სააკაშვილის ხელისუფლების საფირმო ნიშნად რომ ჩამოყალიბდა, ფაქტია.

და ეს მოუშლელი ცინიზმი დღეს, როდესაც ნაცმოძრაობა აღარაა ხელისუფლებაში, საკმაოდ მწვავედ, ლამის რეფლექსების დონეზე ახსენებს ყველას მათი მმართველობის წლებს, იმ პერიოდში განცდილ-გადატანილს, რაც ერთის მხრივ უნარჩუნებს მმართველ კოალიციას უჩვეულოდ მაღალ რეიტინგს, მეორეს მხრივ კი აგროვებს სერიოზულ აგრესიულ მუხტს ნაცმოძრაობისა და მათი მომხრეების წინააღმდეგ.

ანკი სხვანაირად როგორ იქნება, როცა ელიტური კორუფციის ერთ-ერთი სიმბოლო, სამოცდაათი მილიონის გაფლანგვაში ბრალდებული გიგი უგულავა, რომლის მიმართ კიდევ არაერთი პრეტენზია არსებობს, ჯერ ხომ პოლიტიკურ დევნილად წარმოგვიდგება, და მერე კიდევ ისეთ შეურაცხმყოფელ მარგალიტებს აფრქვევს ტრიბუნიდან, მხოლოდ „კინტოთ კილოს, კილოს შუა ბაზრისას“ თუ შეეფერება?

ეს ისტერიულ-აგრესიული რიტორიკა, გარდა იმისა, რომ საპასუხო აგრესიას კვებავს, უკვე აშკარა პროვინციალიზმშიცაა გადაზრდილი, მაგრამ ამას ჯერჯერობით „სვეცკობაზე“ და ინტელექტუალობაზე პრეტენზიის მქონე ნაცებიც ვერ გრძნობენ და ხან გიგის უზრდელობებს უკრავენ ტაშს, ხან ვანოს ალალმართალობას გვიქადაგებენ და ხან ტელეჟურნალისტის უადგილო, „რეალ.ტივის“ საუკეთესო ტრადიციების სტილში ნათქვამი სიტყვებით არიან აღფრთოვანებული.

თავის დროზე ეს ხალხი ბიძინა ივანიშვილს შემოსწყრა: როგორ თუ გაგვიბედა და რიტორიკის გადაწყობა გვირჩიაო, ვინ ჰკითხავს მაგას ჩვენ როგორ ვილაპარაკებთო. კი ბატონო, არავინ არაფერს გაძალებთ და ვერც დაგიშლით, ოღონდ თუკი თქვენივე ირონიაზე მარტო თქვენ გეღიმებათ და სხვებს უფრო „პრესა.ჯი“-ს კორექტულობა და ალისტრახოს იუმორი აგონდება, იმდენს მაინც მიხვდით, რომ რაღაც ისე ვერაა, თქვენ რომ გგონიათ.

P. S. და არ დამიწყოთ ახლა იმის წამოძახება, გერმანიაშია ნასამართლევი პროკურორი თუ ზანზიბარში ნაჯდომი. ეს სულ სხვა ოპერიდანაა და არც გიგის, არც ვანოს და საერთოდ არავის გაპრავებად არ წავა“, - წერს დავით ზურაბიშვილი „ფეისბუქში“.