მასობრივი ინფორმაციის საშუალებებში სასჯელაღსრულების სამინისტროს მიერ ელექტრომული ფოსტის მეშვეობით დაგზავნილი განცხადება, რომელშიც საინფორმაციო სააგენტო „ზონანიუსი“ და ჟურნალისტი გურამ დონაძე იყო მოხსენიებული, სამინისტროს ვებგვერდზე არ იძებნება, თუმცა სამინისტროს პრესსამსახურის უფროსი ირაკლი კორძაია ადასტურებს, რომ განცხადების ტექსტი ნამდვილად ეკუთვნის სასჯელაღსრულების სამინისტროს:

განცხადება უცვლელად გამოაქვეყნეს საინფორმაციო სააგენტოებმა: „ინტერპრესნიუსი“, „პირველი“, „ფრონტნიუსი“. იგი გამოქვეყნდა ასევე „ნიუპოსტზეც“.

სასჯელაღსრულების სამინისტრო განცხადების ტექსტში პირდაპირ ადანაშაულებდა „ზონანიუსსა“ და გურამ დონაძეს ცილისწამებასა და დაკვეთის შესრულებაში:

"საინფორმაციო სააგენტო "ზონა ნიუსი" მორიგ სიცრუეს აქვეყნებს იმასთან დაკავშირებით, თითქოს სასჯელაღსრულების #14 (გეგუთის) დაწესებულებაში მყოფი მსჯავრდებული "სკაიპის" მეშვეობით ქურდად მოინათლა და ამით სამინისტრომ უკვე რეკორდი მოხსნა. ეს არის სამინისტროს დისკრედიტაციისკენ მიმართული აბსოლუტური ტყუილი, რომელსაც შეგნებულად ავრცელებენ გურამ დონაძე და მისი დამკვეთები. სასჯელაღსრულების, პრობაციისა და იურიდიული დახმარების საკითხთა სამინისტრომ ამ ერთი წლის განმავლობაში მართლაც მოხსნა რეკორდი სასჯელაღსრულების დაწესებულებებში დანაშაულის აღკვეთასა და გამოვლენაში, მსჯავრდებულთათვის სათანადო სამედიცინო მომსახურების გაწევასა და პირობით ვადამდე გათავისუფლების მექანიზმით მსჯავრდებულთა გათავისუფლებაში“;

„გვსურს მივმართოთ სააგენტოს ერთ-ერთ დამფუძნებელს, გურამ დონაძეს, თავი შეიკავოს ბინძური ცილისწამებისგან და გაიხსენოს თავისი ახლო წარსული, როდესაც, ჯერ შსს-ს პრესსამსახურის უფროსად, მოგვიანებით კი ტელევიზია "რეალTV"-ს ხელმძღვანელად მუშაობისას ყველა მისი ქმედება ფაქტების გაყალბებასა და ცილისწამებათა მთელ კასკადზე იყო აგებული.

მივმართავთ აღნიშნული სააგენტოს ხელმძღვანელობას, გაიხსენონ და პარალელი გაავლონ 9 წლის განმავლობაში მათი პოლიტიკური ხელმძღვანელობის ნამოქმედარსა და პატიმრების ამჟამინდელ მდგომარეობას შორის და ნუ შეახსენებენ კიდევ ერთხელ საზოგადოებას, რას წარმოადგენდა და ვისგან შედგებოდა მათი დანაშაულებრივი რეჟიმი", - აღნიშნულია სამინისტროს განცხადებაში.

განცხადებაში სამინისტროს მიერ გამოხატულ პოზიციასთან დაკავშირებით „ნიუპოსტი“ ბრალდებათა ადრესატს, ჟურნალისტ გურამ დონაძეს დაუკავშირდა:

„ამ განცხადებაში არაფერია ჩემთვის მოულოდნელი, სოზარ სუბარი მთელი ცხოვრების განმავლობაში მებრძოდა მე, „რეალ ტვ“-ს ჟურნალისტების მიმართაც არაერთხელ გამოუვლენია აგრესია. ჩემთვის გასაგებია, რატომ მებრძვის სოზარ სუბარი: ეს უკავშირდება იმას, რომ სწორედ მე და „ზონანიუსის“ ჟურნალისტებმა ჩავატარეთ ლევან კორტავას მკვლელობას გამოძიება და მინისტრი ვამხილეთ სიცრუეში, ამას გარდა, სუბარის გულისწყრომას იწვევს ისიც, რომ სასჯელაღსრულების ადგილებში არსებულ სიტუაციასთან დაკავშირებით პატიმრები „ზონანიუსს“ ტელეფგონით უკავშირდებიან, მათ ნაამბობს კი სააგენტო ავრცელებს.

ამ ყოველგვარ საფუძველს მოკლებულ განცხადებასთან დაკავშირებით, მის ტირაჟირებასთან დაკავშირებით შემიძლია ვთქვა, რომ სოზარ სუბარს ვაძლევ პირობას: დღევანდელ მის განცხადებაზე და დღემდე ყველა მის განცხადებაზე მოუწევს პასუხისგება, ბოდიშის მოხდა და მორალური ზიანის კომპენსაცია - ხვალ მე, ჩემს ადვოკატებთან ერთად სარჩელს შევიტან სასამართლოში, ამას გარდა, ჩავატარებ საგანგებო პრესკონფერენციას და გამოვუქვეყნებ სოზარ სუბარს ყველა იმ ვიდეომასალას, რომელიც ადასტურებს ჩემს წინააღმდეგ მის ბრძოლას“, - აცხადებს გურამ დონაძე.

„ნიუპოსტი“ დაუკავშირდა ასევე სამინისტროს პრესსამსახურის ხელმძღვანელს, რომელმაც განაცხადა:

„ეს განცხადება გაავრცელა სამინისტრომ, შეადგინა კონკრეტულად ჩემმა თანამშრომელმა, მე ვუწევდი კოორდინირებას. იქ ყველაფერი მკაფიოდ წერია და რაც წერია განცხადებაში, იმაზე მეტს ვერფერს გეტყვით.

გურამ დონაძეს რაც შეეხება, ის ცხოვრობს თავისუფალ ქვეყანაში და როგორც საჭიროდ თვლის ისე შეუძლია მოიქცეს.“- განაცხადა კორძაიამ.