საქართველოს რეფორმების ასოციაციის (GRASS) პროექტის factcheck.ge-ის კვლევის შედეგების თანახმად, 44 ფაქტიდან კოალიცია "ქართულმა ოცნებამ" ერთი ტყუილი თქვა. რაც შეეხება "ერთიან ნაციონალურ მოძრაობას" პარტიას ამ კუთხით მაჩვენებელი ნული აქვს. აღნიშნული ოპოზიციური პარტიის შემთხვევაში 51 ფაქტის სიზუსტე შემოწმდა.

უფრო კონკრეტულად სტატისტიკის მიხედვით, 44 ფაქტიდან "ქართული ოცნების" მიერ ნათქვამი 15 ფაქტი იყო სიმართლე, 8 - მეტწილად სიმართლე, 6 - ნახევრად სიმართლე, 11- მეტწილად მცდარი, 3 - მცდარი, 1 - ფაქტი კი ტყუილი.

რაც შეეხება "ნაციონალურ მოძრობას" 51 ფაქტიდან, 19 იყო სიმართლე, 11- მეტწილად სიმართლე, 10 - ნახევრად სიმართლე, 9 - მეტწილად მცდარი, 2- მცდარი. აღნიშნული ანგარიშის მიხედვით, "ნაციონალურ მოძრაობას" არც ერთ ფაქტთან მიმართებაში ტყული არ უთქვამს.

ამასთან, პროექტის ფარგლებში შესწავლილი იქნა პრეზიდენტობის კანდიდატების განცხადებების სიზუსტე თუ უზუსტობა. შედეგების მიხედვით, საარჩევნო კამპანიის დროს მმართველი გუნდის კანდიდატმა გიორგი მარგველაშვილი 6 ფაქტიდან თქვა ერთი სიმართლე, 2 - მეტწილად სიმართლე, 2 - ნახევრად სიმართლე, 1 - კი ტყუილი. მეტწილად მცდარისა და მცდარის გრაფაში მარგველაშვილს მაჩვენებლი არ აქვს.

რაც შეეხება დავით ბაქრაძეს, 5 ფაქტიდან სიმართლეს შეესაბამებოდა ერთი, მეტწილად სიმართლეს - 1, ნახევრადსიმართლეს - 2, მეტწილად მცდარს - 1, მცდარი ან ტყუილი ფაქტი ბაქრაძეს არ უთქვამს.

ნინო ბურჯანაძის შემთხვევაში 5 ფაქტიდან სიმართლე იყო 1, მეტწილად სიმართლე- 1, მეტწილად მცდარი - 2, მცდარი კი ერთი, ტყუილის გრაფაში ბურჯანაძესაც მაჩვენელი არ აქვს.

გიორგი თარგამაძის მიერ ნათქვამი 7 ფაქტიდან კი სიმართლეს შეესაბამებოდა 1, მეტწილად სიმართლეს - 1, ნახევრად სიმართლეს - 3, მეტწილად მცდარს - 1 და ტყუილსაც - 1.