როლანდ ახალაიას დაკითხვა ანაკლიაში საპატრიარქოსთვის მეგრული ოდის მშენებლობას უკავშირდება

საზოგადოება - 21:17, 25 Dec, 2013

3618

ზუგდიდის მაჟორიტარი დეპუტატი, საპარლამენტო უმცირესობის წევრი, ყოფილი ზუგდიდის საოლქო პროკურორი როლანდ ახალაია აცხადებს, რომ მისი ოჯახის დევნა ხდება.

როლანდ ახალაიას მიერ გავრცელებულ განცხადებაში ნათქვამია, რომ სამეგრელოში პროკურორად დანიშნული ვალერი იოსავა ირაკლი ალასანიას რეკომენდაციით დაინიშნა და ის არის ყოფილი მხედრიონელის თემურ გერგაიას დეიდაშვილი, რომელსაც მაჟორიტარულ არჩევნებში ახალაიას გამარჯვების შემდეგ ირაკლი ალასანია უგზავნიდა ქურდული გარჩევებისთვის. ახალაია წერს, რომ ამის დამადასტურებელი აუდიო და ვიდეომასალა გააჩნია.

როლანდ ახალაია აცხადებს, რომ მის ხელთ არსებული ინფორმაციით, მისი დაკითხვა საპატრიარქოსთვის ანაკლიაში მეგრული ყაიდის ოდის მშენებლობის მცდელობას უკავშირდება.

ზუგდიდის მაჟორიტარი დეპუტატი მის მიმართ არსებული კითხვების საჯაროდს დასმას ითხოვს და აცხადებს, რომ მათ საჯაროდვე გასცემს პასუხს.

„ნიუპოსტი“ როლანდ ახალაიას განცხადებას სრულად გთავაზობთ:

„მინდა საზოგადოებას შევახსენო, რომ 2001 წელს, შევარდნაძის ხელისუფლების პირობებში, ვინაიდან ჩავთვალე, რომ პროკურატურაში მუშაობა კორუფციის გარეშე შეუძლებელი გახდა, პროტესტის ნიშნად გადავდექი ზუგდიდის რაიონული პროკურორის თანამდებობიდან.

აღნიშნული გადაწყვეტილება იყო უპრეცედენტო საქართველოს პროკურატურის სისტემაში. 2003 წლის „ვარდების რევოლუციის“ შემდეგ მოსულ ხელისუფლებასთან ერთად ჩემი შვილები, რომლებიც იყვნენ 22–23 წლის ასაკში, სათავეში ჩაუდგნენ ბრძოლას კრიმინალისა და კორუფციის წინააღმდეგ, რაც ყველაზე მეტად აწუხებდა საზოგადოებას.

მიუხედავად უდიდესი წინააღმდეგობისა, ორივე ეს პრობლემა იქნა გადაწყვეტილი დადებითად, რაც აისახა თითოეული საქართველოში მცხოვრები ოჯახის ყოველდღიურ ყოფაზე.

სწორედ ამ პრობლემების მოგვარებამ მისცა საშუალება ქვეყანას განეცადა წინსვლა, რაც განხორციელდა 2004–2012 წლებში. 2012 წლის საპარლამენტო არჩევნების შემდეგ ახალმა ხელისუფლებამ დაიწყო უპრეცედენტო დევნა ჩვენი ოჯახის მიმართ, ააგორა ბინძური პიარი და გამოიყენა დაუშვებელი მეთოდები. სწორედ ეს გახდა განმსაზღვრელი ბაჩოსთვის, გადაეწყვიტა ქვეყანაში დაბრუნება და ყველა კითხვისთვის პასუხის გაცემა.

ამის საშუალება პროკურატურამ არ მისცა და ჩამოსვლიდან მეორე დღესვე შეუთითხნა დაუსაბუთებელი ბრალდებები, რაც სასამართლოზე საპნის ბუშტივით გასკდა. ამ დღეებში საქართველოს პროკურატურამ კვლავ განაგრძნო ჩვენი ოჯახის მიმართ შავი პიარის გავრცელება და საინფორმაციო საშუალებებით გავრცელდა ინფორმაცია ჩემი პროკურატურაში დაბარების შესახებ.

სამწუხაროდ, დღეს პროკურატურა ჩამოყალიბდა პოლიტიკური დევნის იარაღად და აცდა მის მთავარ დანიშნულებას - ებრძოლოს დანაშაულს. საზოგადოებას მინდა განვუმარტო, რომ 2012 წლის 1 ოქტომბერს მე ზუგდიდის მოსახლეობის დიდმა უმრავლესობამ თავის წარმომადგენლად ამირჩია საქართველოს პარლამენტში, რის გამოც ჩემი ოპონენტი ირაკლი ალასანია გადავიდა ქურდულ გარჩევებზე და შუამავალი პირის, ყოფილი მხედრიონელის თემურ გერგაიას ხელით სცადა ჩემი გზიდან ჩამოცილება, რისი დამადასტურებელი აუდიო–ვიდეო ჩანაწერები გამანჩია.

სწორედ გერგაიას დეიდაშვილია ვალერი იოსავა, რომელიც ალასანიას რეკომენდაციით გახდა საოლქო პროკურორი და რომელსაც დაევალა ჩვენი ოჯახის მიმართ ცრუ ბრალდებების შეთითხვნა. მე მაქვს ინფორმაცია, რომ სწორედ მის პერიოდში დაიწყო სისხლის სამართლის საქმე უფლებამოსილების გადამეტების ფაქტზე, რაც თითქოსდა გამოიხატა შემდეგში:

2009 წელს სამეგრელოს ეწვია საქართველოს პატრიარქი, უწმინდესი და უნეტარესი ილია II. მისი სამეგრელოში მობრძანებისას საზოგადოების მოთხოვნით გადაწყდა, რომ ზუგდიდში უნდა აშენებულიყო საპატრიარქოს რეზიდენცია. უწმინდესმა მთხოვა, რომ მეხელმძღვანელა საპატრიარქოს რეზიდენციის მშენებლობისთვის. პატრიარქის მითითებით, საპატრიარქოს არქიტექტორის მიერ დაიწყო პროექტის მომზადება.

ზუგდიდისა და ცაიშის მიტროპოლიტ მეუფე გერასიმესთან ერთად ანაკლიის სანაპიროზე შეირჩა ადგილი, სადაც უნდა აშენებულიყო საპატრიარქოსთვის მეგრული ყაიდის ოდა. ამ პერიოდში ანაკლიაში მომუშავე შ.პ.ს. „სანის“ ანგარიშზე სამეგრელოში მოღვაწე ბიზნესმენებმა ნებაყოფლობით, კანონიერად ჩარიცხეს თანხები. თვით “სანის” ხელმძღვანელობაც გამოთქვამდა მზადყოფნას თავისი სახსრებით მონაწილეობა მიეღო ამ მშენებლობაში.

ვინაიდან ანაკლიაში შერჩეულ ადგილზე ვერ მოხერხდა მიწის ნაკვეთის გამოყოფა, პროექტი შეჩერდა, ხოლო შენატანი თანხა არ გახარჯულა. რამდენადაც ჩემთვის ცნობილია, მითითებული თანხა ისევ დღემდე ირიცხება შ.პ.ს. “სანის” ანგარიშზე.

ეს გახლავთ ჩემს მიმართ აღმოჩენილი ყველაზე დიდი „კომპრომატი“ - რადგან ჩემი ოჯახის მიმართ ხელისუფლების მხრიდან მიმდინარეობს პოლიტიკური დევნა, მე მოვითხოვ ჩემს მიმართ არსებული კითხვები საჯაროდ იქნას დასმული და მზად ვარ საჯაროდვე გავცე პასუხი.

ჩემი რწმენითა და ნაკეთები საქმეებით არასდროს მომიხდენია საზოგადოებაში მანიპულირება და დღესაც არ ვისაუბრებდი, რომ არა პროკურატურის მიერ აგორებული შავი პიარი.

შანტაჟის და ჩემი ოჯახის წევრების უკანონო დევნის მიუხედავად, მიზანს ვერ მიაღწევენ და ჩვენ არ გავცვლით ღირსებას თავისუფლებაზე“, - ნათქვამია როლანდ ახალაიას განცხადებაში.