საქართველოს პრემიერმინისტრმა ირაკლი ღარიბაშვილმა ქვეყნის მოქალაქეთა იმ ნაწილს, რომელიც 25 დეკემბერს შობას ზეიმობს, დღესასწაული მიულოცა.

მილოცვის ტექსტი „ფეისბუქზე“ ირაკლი ღარიბაშვილის ოფიციალურ ვებგვერდზე გამოქვეყნდა:

„დღეს მსოფლიო საქრისტიანოს დიდი ნაწილი შობის დღესასწაულს აღნიშნავს. ქრისტეს დაბადება არის დასაწყისი ევროპული ცივილიზაციის, სრულიად ახალი კულტურის, სამყაროს მიმართ ახალი დამოკიდებულების. მაცხოვრის შობა არის პირველ რიგში სიკეთის, ჰუმანიზმის დღესასწაული.

ვულოცავ ამ დღეს ყველა ჩვენს თანამოქალაქეს, ვისთვისაც 25 დეკემბერი დიდი დღესასწაულია. ვუსურვებ მათ ბედინიერებას, კეთილდღეობას და დიდ წარმატებას მშვიდობიან საქართველოში“, - ნათქვამია მილოცვის ტექსტში.