დღეს საქალაქო სასამართლოში ყოფილი პრემიერმინისტრის ვანო მერაბიშვილის საქმის განხილვა მიმდინარეობდა, თუმცა, 26 მაისის ეპიზოდის მორიგი პროცესი ბრალდებულის გარეშე დასრულდა.

ყოფილმა პრემიერმა სასამართლო პროტესტის ნიშნად მაშინ დატოვა, როდესაც მისი შუამდგომლობა სასამართლომ არ დააკმაყოფილა:

„მიეცით ჩემს ბადრაგს უფლება, რომ გამიყვანოს და მე ამ სამარცხვინო და სასირცხვილო პროცესში მონაწილეობას არ მივიღებ“, - განაცხადა ვანო მერაბიშვილმა.

ვანო მერაბიშვილმა სასამართლო სხდომა დაწყებიდან რამდენიმე წუთში, პროტესტის ნიშნად დატოვა, მანამდე კი ,,ნაციონალური მოძრაობის“ გენერალურმა მდივანმა მოსამართლეს შუამდგომლობით მიმართა და საკუთარი განცხადების საფუძველზე კვლავ გამოძიების დაწყება და საკანში გადაღებული კადრების გასაჯაროება მოითხოვა.

„მაშინ, როდესაც პრემიერმინისტრმა, მთელმა მთავრობის ელიტამ, პრაქტიკულად, უარი თქვა საქართველოში კანონის აღიარებაზე, ქალბატონ მოსამართლეს მინდა შევთავაზო - თქვენ დაავალოთ პროკურატურას ჩატარდეს გამოძიება ამ საკითხთან დაკავშირებით“, - თქვა მერაბიშვილმა, თუმცა, მოსამართლემ ეს შუამდგომლობა არ დააკმაყოფილა.