საქართველოს ტერიტორიაზე, საჯარო თავშეყრის ადგილებში, მაგალითისთვის, იოსებ ბესარიონის ძე სტალინის ძეგლის დადგმა ან, შესაბამისი გადაწყვეტილების არსებობის შემთხვევაში, უკვე დადგმული ძეგლის არაღება და/ან მისი აღებისთვის ხელის შეშლა თავდაპირველად გაფრთხილებით, გაფრთხილების უგულებელყოფის შემდეგ კი 1000 ლარიანი ჯარიმით დაისჯება. - შესაბამის ცვლილებას საქართველოს კანონში „თავისუფლების ქარტია“, ასევე ცვლილებას ადმინისტრაციულ სამართალდარღვევათა კოდექსში პარლამენტი მეორე მოსმენით დღეს მიიღებს.

საკითხი ეხება არამხოლოდ სტალინის ძეგლსა და ბიუსტებს, არამედ ყველა კონკრეტულ თუ აბსტრაქტულ სუბიექტს, რომელიც ჩამოთვლილია „თავისუფლების ქარტიის“ მიზანში:
„კომუნისტური ტოტალიტარული და ფაშისტური იდეოლოგიების საფუძვლების გაღვივების წინააღმდეგ პრევენციული ღონისძიებების განხორციელება, კომუნისტური ტოტალიტალური და ფაშისტური სიმბოლიკის, საკულტო ნაგებობების, ძეგლების, მონუმენტების, ბარელიეფების, წარწერების, ქუჩების, მოედნების, სოფლებისა და დაბების სახელწოდებების აღმოფხვრა, ასევე კომუნისტური ტოტალიტარული და ფაშისტური იდეოლოგიების მატარებელი და პროპაგანდის სხვა საშუალებების აკრძალვა“.

როგორც საპარლამენტო უმცირესობის წევრი ზურაბ ჯაფარიძე წერს, „თავისუფლების ქარტიაში“ შესატანი ცვლილებები ლევან ბერძენიშვილმა და თამარ კორძაიამ მოამზადეს:

„ჩემი აზრით, ეს იქნება საუკეთესო კანონი, რომელიც ამ პარლამენტმა მიიღო. ერთი წლის განმავლობაში პირველად მაქვს განცდა, რომ რაღაც ფასეულს ვაკეთებთ“, - აცხადებს ზურაბ ჯაფარიძე.